‏ Ephesians 4

Иткдг улс негдх зөвтә

1Би Деед Эзнд церглҗәсәрн бәрәнә күн болҗанав. Тадниг Бурхна дуудврла ирлцтәһәр бәәтн гиҗ эрҗәнәв. 2Кезә чигн тогтун, номһн болн тесвртә болтн. Нег-негнләһән тесвртәһәр дуран өгч бәәтн. 3Тадн нииһәр бәәхин арһ хәәтн. Тиим негдлтиг Әрүн Сәкүсн тадниг негдүлҗәх эвәр дамҗад таднд өгчәнә. 4Негхн цогц-махмуд болн негхн Сәкүсн бәәдг болҗана. Бурхн тадниг бас негхн нәәлврт дуудв. 5Һанцхн Деед Эзн, негхн иткл, негхн уснд кирсллһн бәәнә. 6Негхн Бурхн бәәнә. Тер цуг күмнә Эцк болҗана. Хамг әмтнә деер Эн бәәнә. Цугтаһар дамҗад эврәннь седвәр күцәнә. Күн болһнд Бурхн бәәнә ▼

▼Бурхн мадн дотр бәәнә.

. 7Христосин аһу ик зөөрәс мадн дундас күн болһн шишлң билг авв. 8Бурхна Бичгт иигҗ бичәтә: «Хамгин ик өндрт өөдлхләрн Тер бәрәд авсн улс дахулҗ авад, күмнд олн билг өгв». 9«Өөдлв» – гисн юмб? Урднь Христос һазрин ик гүүнднь күрсн күн болҗана. 10Күрсн күн альд чигн бәәхин төлә теңгрәс деегшән һарсмн болҗана. 11Тиигәд теднә негнь – апостолмуд, хойрдгчнь – әәлдәчнр, һурвдгчинь – Сән Зәңг тархачнр, зәрмснь иткдг улст килмҗән өгдг улс болн багшнр болтха гиҗ шиидв. 12Эврәннь цогц-махмуд өскхин төлә Христос цуг иткдг улсиг Бурхна церглтд белдхәр тиигв. 13Тиигәд одҗ бидн цугтан эврәннь итклдән болн Бурхна Көвүг медхдән негдлтд күрхвидн. Бидн иткләрн Христосла әдл бөдүн улс болхвидн. 14Дәкҗ бидн дольганд болн зүсн-зүүл номин салькнд цокгдҗ, үзг болһн тал дәәвлҗ йовх бичгүд болшговидн. Эн зүсн-зүүл худлчнрин ном. Тедн худл 15Терүнә ормд бидн үнн үг келәд, нег-негндән дурлх зөвтәвидн. Мана толһа болҗах Христосла нииләд өсх зөвтәвидн. 16Христосин һардврар цогц-махмудын мөчмүд негднә. Теднә залһлдаһар цогц-махмуд кевтән бәрәтә. Мөч болһн эврәннь кергән даахла, цогц-махмуд тегәд кевтән өсәд, дурар батрна.

Урдк җирһл болн шин җирһл

17– 18Тиигәд би Деед Эзнә нерн деерәс таднд закҗанав: буру номта улс кевтә бәәдгән ууртн. Теднә седвәр хоосн, теднә ухань харңһутрҗ одҗ, теднд Бурхна җирһл уга. Яһад гихлә, медрл уга көндлң улс. 19Тедн ичрән гееһәд оньдин кемҗән угаһар аля болн зүсн-зүүл бузр юмнд авлгдна. 20– 21Тиим җирһл Христосин тускар тана медснлә ирлцҗәхш. Юңгад гихлә, тадн Христосин тускар соңсвт. Исуст иткдг улс болад тадн Терүнә туск үнн медрл аввт. 22Кезәңк күүнә бәәдлән хайтн. Тер урдк бәәдл тадниг худл седвәрәрн алҗаҗ. 23Эврәннь ухан-седклән тадн шинрүлх йостат. 24Тадн шин күн болх йостат. Тер шин күүг Бурхн Бийән дуралһад үүдәҗ. Тер күн үннлә ирлцҗ чик седклтәһәр болн әрүнәр бәәнә. 25Күн болһн худл келдгән ууртн. Цугтан нег цогц-махмудын мөчмүд болсар, хаҗудк улстан үнн үг келтн. 26Уурлхларн бичә килнц һарһтн, нарн суутл ууран һарһтн. 27Тадниг сөрх арһ эрлгт бичә өгтн. 28Хулха кедг күн дәкҗ бичә хулхалтха. Кергтә мөңгән эврәннь чик күч-көлсәрн тер олтха. Олснасн түрү бәәх улсла хувалцтха. 29Күүнд му үг бичә келтн. Зуг соңсҗах күүнд сурһх, кергтнь дөң болх үгмүд келтн. 30Бурхна Әрүн Сәкүс бичә һундатн. Тертн тадниг Бурхна улс гисн тамһ болҗана. Цагнь ирхлә, Бурхн мадниг кевтнь сулдххиг тер лавлҗана. 31Һундлас, уурас, һалзуһас, хәәкрлһнәс, му, бузр үгәс болн талдан күүнд хоран күргх юмнас гетлтн. 32Нег-негнтәһән цаһан санатаһар бәәтн, хәәрлтән күргтн. Бурхн Христосар дамҗад тадна гем тәвҗ өгсн әдләр нег-негнәннь гем тәвтн.