Heb 1 | XalIBTNT | STEP | Кезәнә Бурхн әәлдәчнрәр дамҗад кесг дәкҗ олн зүсн эв-арһ олзлад, мана өвк эцкнрт келдг бәәсмн.

‏ Hebrews 1

Бурхн Эврәннь Көвүһәрн дамҗад келдг бәәсмн

1 Кезәнә Бурхн әәлдәчнрәр дамҗад кесг дәкҗ олн зүсн эв-арһ олзлад, мана өвк эцкнрт келдг бәәсмн. 2 Эн сүл өдрмүдт Бурхн Эврәннь Көвүһәрн дамҗад маднд келдг бәәсмн. Бурхн Көвүһәрн дамҗад нарт делкә үүдәһәд, цугин өнч авх Көвү кесмн. 3 Көвүнднь Бурхна туурмҗ үзгднә. Көвүн Бурхна йосн дүр болҗана. Бурхна Көвүн цуг нарт делкәг Эврәннь күчтә Үгәрн бәрнә. Әмтнә килнц тәвснә хөөн теңгрт хамгин күчтә йосна барун бийд Тер суусмн.

Христос Бурхна элчнрәс ик күчтә

4 Көвүн Бурхна элчнрәс деер болв, тиим кевәр Терүнд Бурхна өгсн нернь Бурхна элчнрин нердәс деер болв. 5 Яһад гихлә, Бурхн ямаран чигн элчдән кезәчн: «Чи – Мини Көвүнч, эндр Би Чини Эцк болв», – гиҗ келсмн уга. Бурхн ямаранчн элчин тускар кезәчн: «Би Энүнә Эцк болхв болн Эн Мини Көвүн болх», – гиҗ эс келсмн болдг. 6 Зуг Бурхн Эврәннь Ууһн Көвүһән орчлңд илгәх цагт иигҗ келсмн: «Бурхна цуг элчнр Терүнд сөгдтхә». 7 Бурхна элчнрин тускар Тер: «Та Эврәннь элчнрәр сальк кенәт, Эврәннь зарцнрар шачасн һал кенәт», – гиҗ келв. 8 Көвүнә тускар болхла, Бурхн иигҗ келҗәнә: «О, Бурхн, Тана заллт мөңкиндән бәәх, Та үнн чикәр Эврәннь алвтан залҗ йовнат. 9 Та чик бәәдлд дуртат, йос эвдхдән дур угат. Эн учрар Бурхн, Тана Бурхн, Таниг байрин олив тосар Тана үүрмүдт түркснәс үлү икәр түрксмн». 10 Дәкәд иигҗ бичәтә бәәнә: «Деед Эзн, Та хамгин түрүнд һазр үүдәвт, теңгр Тана һарар кесн керг болҗана. 11 Цуг эн уга болҗ одх, зуг Та үлдхит. Цуг эн хувцнла әдл элҗ одх. 12 Та эдниг хуучн хувцн кевтәһәр орахит, эдн хувцн кевтәһәр сольгдх. Зуг Та нег кевтән бәәхит, Тана насн төрүц чилшго». 13 «Чини өшәтнриг көл дорчн тулур кевтәһәр эс тәвтл барун һартм су», – гиҗ Бурхн нег чигн элчдән кезә чигн келәд уга. 14 Бурхна цуг элчнр церглдг сәкүсд болна, тедн аврлтд күртх улст нөкд болхар Бурхнар илгәгднә.