‏ Hebrews 10

1Закан әмтнд хөөтндән ирх сәәһин дүрсн биш, теднә сүүдр болдг бәәсмн. Оньдиндән җил болһн тәкгдсн әдл тәкләр Бурхнд сөгдхәр ирдг улсиг Закан төрүц цеврлүлҗ чадшго. 2Кемр закан энүг кеҗ чадсн болхла, әмтн тәкл тәкдгән уурх билә. Яһад гихлә, тедн килнцәсн цеврдәд, килнцәс көлтә бурутав гиҗ саншго билә. 3Зуг тәкләр җил болһн әмтнд килнцин тускар сана орулна. 4Яһад гихлә, бухмудын болн текмүдин цусн килнциг уга кеҗ чадшго.

5Иим учрар Христос эн орчлңд ирхдән Бурхн: «Та тәкл чигн, бәрц чигн авхар седсн угат, зуг Та Нанд цогц белдвт. 6Та һалд шатгдсн, килнцәс көлтә тәксн тәклиг таасҗахшит. 7Тиигхлә Би иигҗ келләв: О, Бурхн! Би Бурхна Бичгт мини тускар бичгдсәр Тана таалыг күцәхәр ирсн бәәнәв», – гиҗ келв. 8Урднь Христос иигҗ келлә: «Та һалд шатагдсн болн әмтнә килнцәс көлтә тәксн тәклиг таасҗахшит». Эн тәклмүд Закаһар тәкгднә. 9Энүнә хөөн Христос иигҗ келв: «Би Тана таалыг күцәхәр ирсн бәәнәв». Тегәдчн Бурхн хуучн тәклин туск зокал уга кеһәд, соңсхврин туск зокалар сольв. 10Исус Христос Бурхна таалыг күцәсн төләд бидн тәкләр дамҗад килнцәсн цеврлгдсн биләвидн. Тәкл гиснь – нег дәкҗ Христос Эврәннь цогцан өгсн үүл йовдл.

11Оньдинд өдр болһн әдл тәклмүд тәкҗ, гелң болһн церглтән күцәнә. Эн тәклмүд күүнә килнциг төрүц уга кеҗ чадшго. 12Зуг Христос әмтнә килнцәс көлтә негхн тәкл тәкҗ, Бурхна барун бийд суусмн. 13Бурхн өшәтнриг көл дорнь тулг болһҗ эс тәвтл Христос тенд күләҗәнә. 14Негхн тәкләр Тер килнцәс цеврлҗәх улсиг оньдиндән дуту уга болһҗ.

15Әрүн Сәкүсн маднд бас герчләд, негдвәр, иигҗ келҗәнә: 16«Тер өдрмүдин хөөн Би теднлә иим бооца батлнав гиҗ Деед Эзн келҗәнә. Би Эврәннь Закаһан теднә уха-сананднь орулад зүркнднь бичхв». 17Цааранднь Әрүн Сәкүсн келҗәнә: «Дәкҗ теднә килнцинь болн му йовдлмудынь төрүц тодлшгов». 18Килнц тәвгдхлә, килнцәс көлтә тәкл тәкх керг уга.

Бидн Бурхнд өөрдх зөвтәвидн

19Тегәд, ахнр-дүүнр, бидн Исусин цусар дамҗад, хамгин әрүн бәәрнд шин болн әмд хаалһар орҗ чадҗанавидн гиҗ лавта меднәвидн. 20Эн хаалһиг Исус маднд көшгәр дамҗад, талданар келхд, Бийиннь цогцар дамҗад сексмн. 21Манад Бурхна гер деер Алдр Гелң бәәнә. 22Эн учрар үнн седкләрн буруһасн цеврдсн зүрктәһән, цевр усар уһагдсн цогцтаһан, цуг бийәрн иткәд, Бурхн тал өөрдий. 23Әмтнд өгсн амн үгин нәәлврт батар зогсий. Яһад гихлә, Бурхн өгсн үгән оньдин күцәнә. 24Тегәд нег-негән медлцҗ, нег-негндән дурта болҗ, нег-негндән сә кех арһ хәй. 25Чонҗан үлдәдг авъяста улсла әдл чонҗан үлдәхмн биш. Зуг нег-негндән улм икәр урмд өгхмн. Яһад гихлә, Деед Эзнә өдр өөрдҗ йовхинь тадн үзҗәнәт.

26Кемр бидн секгдсн үнниг медә бәәҗ килнц цаарандан чигн кеһәд бәәхлә, тер килнциг нег чигн тәкл тәвүлҗ чадшго. 27Тиим юмн учрхла, бидн ик әәмшгтәһәр ирх зарһиг болн Бурхна өшәтнриг уга кедг, өршәңгү уга һалыг күләх болҗанавидн. 28Мошен Закаг эс соңсдг күүг хойр болн һурвн герчин үгмүдәр өршәңгү угаһар алдг бәәсмн. 29Ухалтн: Бурхна Көвүг басдг, килнцәснь цеврдүлсн болн бооцана цусиг әрүн юмнд тоолдго, хәәрлтин Сәкүсиг му келдг күн ямаран ик цааҗла харһх! 30Яһад гихлә, «Би өшәһинь авхв», болн «Күүнә һарһсн буруһин ашар Би терүг цааҗлхв» гисн үгмүдин Эзинь бидн меднәвидн. Дәкәд Тер иигҗ келсн бәәнә: «Деед Эзн Эврәннь улсан зарһла харһулх». 31Әмд Бурхна һарт бәргдхлә, йир әәмшгтә юмн!

32Урдк цаган, Бурхна герл авсн цаган тодлтн. Тадн ик зовлң эдлсн биләт, зуг ямаранчн зовлң дааҗ чадлат. 33Зәрмдән тадниг әмтнә чирәд му келдг, зовадг билә. Тиим зовлң даасн улсин җирһлд тадн зәрмдән орлцҗ, нөкд болдг биләт. 34Түүрмд суусн әмтнд ▼

▼Оңдан экн бичгт «түүрмд суусн нанд» гиҗ бичәтә.

тадн сана зовдг биләт. Тана гермүдиг булаҗ авсн цагт тадн ик байрта биләт. Яһад гихлә, тадн энүнәс сән болн мөңк юмс эдлхән меддг биләт. 35Зөргтә бәәдлән бичә алдтн, яһад гихлә, зөргтә бәәхлә хамгин сәәнәр ачтн хәрүлгдх. 36Бурхна таалыг күцәхин төлә, Терүнә өгхәр бәәсиг авхин төлә тадн ик тесвртә бәәх зөвтәт. « 37Яһад гихлә, удл уга невчкн цаг болад Ирдгнь ирх, икәр удшго. 38Мини чик седклтә күн иткләрн бәәх, зуг кемр күн Намаг дахдган уурхла, тер Нанд тааста болшго». 39Зуг бидн Бурхиг дахдган уурад, үкллә харһх улс бишвидн. Бидн иткнәвидн, тегәд авргдвидн.