‏ Hebrews 13

Бурхнд яһҗ тааста болхмб?

1Иткдг ахнр-дүүнр мет нег-негндән дурта болад бәәтн. 2Зуульч улсиг кезәчн гиичлүлхән бичә марттн. Тиигҗ кеһәд зәрмснь медлго, Бурхна элчнриг гиичлүлсмн. 3Түүрмд бәәсн улсиг бичә марттн. Тадн бийстн түүрмд бәәсн метәр теднә тускар ухалтн. Зовлң дааҗасн улсиг бичә марттн, бийстн зовлң дааҗах мет теднә тускар ухалтн.

4Гертә-бүлтә бәәдл-җирһлиг цуһар күндлх зөвтә. Залу гергн хойр хоорндан итклтә болх зөвтә. Хуульч болн аля улсиг Бурхн зарһла харһулх.

5Мөңгнд дегд дурта бичә болтн. Бәәсәрн байн болтн. Яһад гихлә, Бурхн иигҗ келв: «Би чамаг үлдәшгов, Би чамаг хайшгов». 6Тегәд зөргтәһәр келҗ болҗана: Деед Эзн – мини нөкд. Би юмнас әәшгов? Күн нанд ю кехмб?

7Тадниг Бурхна үгәр сурһсн һардачнран бичә марттн. Теднә җирһлин болн үклин тускар ухалад, тедниг дураҗ итктн. 8Исус Христос Өцклдүр, эндр, мөңкиндән нег кевәрн бәәнә, төрүц хүврхш. 9Таднд күүнә болдг олн зүсн ном чик хаалһастн бичә хаҗилһтхә. Тана седклтн хотын туск зокалмуд күцәлһнәр биш, Бурхна хәәрлтәр батрдгнь сән. Хотын туск зокалмуд күцәдг улст эн зокалмуд олз өгшго.

10Манад тәклин ширә бәәнә. Евреймүдин сегт церглдг улс тер ширәһәс хот идх зөв уга бәәсмн. 11Яһад гихлә, ах гелң хамгин әрүн бәәрнд әмтнә килнц тәвүлхин төлә малын цус орулна. Малмудын цогцнь болхла, әмтн бүүрлдг һазрин ард шатагддг бәәсмн. 12Тегәд чигн Исус әмтиг килнцәснь цусарн цеврлхәр балһсна ард үксмн. 13Тегәд чигн әмтн бүүрлдг һазрин ард һарад Терүнүр йовхм, Исусин му нериг хувалцхм. 14Яһад гихлә, энд һазр деер бәәх балһсн манад уга болад, бидн иргч балһсиг хәәҗәнәвидн. 15Тегәд Исусар дамҗад, Бурхнд нерәдсн бәрц болсн магтал оньдиндан өргий. Магтал гиснь – амнас һарчах Бурхнд нерәдсн бәрц болҗана. Эн бәрц: Исус – Деед Эзн гисн үгмүд. 16Нег-негндән сә кеҗ, нөкд болдган бичә марттн. Яһад гихлә, эн Бурхнд тааста бәрц.

17Таднд сурһмҗ өгдг улсин үгд орад, теднә келсинь күцәтн. Тедн килмҗән өгәд, тана седклиг оньдин хәләнә. Яһад гихлә, тедн эврәннь цергллһнә туск тооцаһан Бурхнд өгх зөвтә. Эн учрар эврәннь көдлмшән байртаһар күцәҗ зөвүр угаһар тедн бәәтхә. Кемр эс тиигхлә, эн таднд олз өгшго.

18Мана төлә зальврад бәәтн. Яһад гихлә, бидн седклдән гем уга бәәнәвидн гиҗ лавта келҗ чадҗанавидн. Тегәд үнн чикәр бәәхәр шунҗанавидн. 19Бурхн намаг удл уга таднур йовултха гиһәд зальвртн гиҗ, би үнн седкләрн эрҗәнәв.

Зальврлһн

20– 21Мана Деед Эзн Исусиг эс гиҗ хөөдин алдр Хөөчиг мөңк бооцана цусар дамҗад әмдрүлсн Эвин Бурхн таднд Терүнә таалыг күцәхд кергтә сәәг өгх болтха! Исус Христосар дамҗад, Бурхнд тааста юм мана дотр Тер күцәтхә! Исус Христос мөңкиндән тууртха! Тиигтхә!

Төгсвр

22Ахнр-дүүнр, эн урмдта үгмүд седкләрн орултн гиҗ би эрҗәнәв. Яһад гихлә, мини бичсн бичг ик биш. 23Мана дү Тимофей түүрмәс сулдхвр авснь медтн. Кемр тер удл уга ирхлә, би тадниг терүнлә хамдан бәәсинь үзхүв.

24Тана һардачнрт болн Бурхна улст менд илгәҗәнәв. Италин ахнр-дүүнр таднд менд илгәҗәнә.

25Бурхна хәәрлтд тадн багтад бәәх болтха!