Heb 2 | XalIBTNT | STEP | Салькнд туугдсн керм мет болш уга төләд бидн соңссндан оньган икәр өгч бәәх зөвтәвидн.

‏ Hebrews 2

Алдр аврлт

1 Салькнд туугдсн керм мет болш уга төләд бидн соңссндан оньган икәр өгч бәәх зөвтәвидн. 2 Бурхна элчнрәр дамҗад келсн үг итклтә билә. Тегәд эн үгиг эс соңссн болн эвдсн күн болһн үнн чикәр цааҗла харһулгдх йоста билә. 3 Бидн тиим алдр аврлтд оньган эс өгхлә, цааҗас алдрҗ чадшговидн. Эн аврлтын тускар Деед Эзн Бийнь әмтнд зәңглсн бәәнә. Энүнә тускар соңссн улс аврлт йосн үнн гиҗ маднд лавлҗ келсмн. 4 Бурхн энүг онц темдгәрн, өвәрц йовдларн, олн зүсн сүркә йовдларн болн Эврәннь тааларн, әмтнд өггдсн Әрүн Сәкүснә билгәрн батлҗ үзүлсмн.

Мадниг аврлтур дахулҗ йовснь

5 Мана келҗәсн иргч орчлңгиг залхин кергт Бурхн элчнрән тәвсн уга. 6 Тиим биш, Бурхна Бичгт нег кесгт иигҗ бичәтә: «Күн гисн кемб? Яһад Та энүг эс мартнат? Күмни көвүн гисн кемб? Яһад энүг Та килмҗтәһәр хәләдвт? 7 Та ахр болзгт терүг Бурхна элчнрәс дор тәвләт. Терүнә толһад туурмҗта болн ачта титм Та зүүввт. 8 Цуг заллтыг терүнә һарт өгвт». Терүнә һарт цуг заллтыг өгсн цагтан, Бурхн нег чигн юм үлдәлго күүнә заллтд орулсмн. Зуг цугнь күүнә заллтд бәәхинь ода бидн үзәд угавидн. 9 Исус Бурхна хәәрлтәр цуг улсин төлә үкхәр ахр болзгт Бурхна элчнрәс дор тәвгдсинь бидн үзҗәнәвидн. Эн үкллә харһҗ зовснднь Исуст туурмҗин титм зүүгдсинь бидн бас үзҗәнәвидн. 10 Бурхнар болн Бурхна төлә цугнь үүдәгдсн бәәнә. Бурхн кесг көвүдиг туурмҗд орулх зөвтә билә. Зовлңгар дамҗад Исусиг, аврлтын һардачиг, Бурхн дуту уга болһҗ кесмн.

11 Яһад гихлә, әрүслдгнь болн әрүслгддгнь нег Эцктә. Эн учрар Исус тедниг ахнр-дүүнр гисндән ичхш. 12 Исус Бурхнд: «Би Тана нериг ахнр-дүүнртән келнәв. Би иткдг улсин заагт Таниг туурулнав», – гиҗ келнә. 13 Дәкәд бас иигҗ келнә: «Би Бурхнд нәәлнәв», болн «Энтн Бив, Бурхна өгсн үрдүдтә хамдан бәәнәв».

14 Эн үрдүд йирин улс бәәсн учрас Исус бас теднлә әдл күн болв. Эврәннь үкләрн үклин эзиг эс гиҗ эрлгиг уга кехәр Исус тиим болв. 15 Үкләс әәһәд, җирһлин туршт мухла болсн улсиг сулдххар Исус тиигсмн. 16 Яһад гихлә, Бурхна элчнрт биш, Абрахамин үлдл тохмд Тер нөкд болҗасинь медгдҗәнә. 17 Тер учрар Бурхна өмн итклтә болн өршәңгү ах гелң болхар, әмтнә килнц тәвгддгәр Тер цуг бәәдләрн ахнр-дүүнрлә әдл бәәх зөвтә бәәсмн. 18 Тегәд чигн Тер Бийнь сөрлһнлә харһад зовлңган эдлсн учрас сөргдҗәх улст ода нөкд болҗ чадх.