Hebrews 3
Исус Мошеһәс деер
1Тегәд Бурхнар бас дуудгдсн, әрүн ахнр-дүүнр, мана итклин элч болн ах гелң Исусин тускар ухалад бәәтн. 2Исус церглтд орулсн Бурхнд итклтә бәәсмн. Тиим кевәр Моше Бурхна герт итклтә бәәсмн. 3Тосхач герәс даву ик ачта болҗана. Тер учрар Исус Мошеһәс даву ик ачта болҗана. 4Гер болһн эврәннь тосхачта, болв Бурхн болхла цуг юмна Тосхач. 5Иргчдән Бурхна келхиг герчлхәр, Моше Бурхна герт зарц мет итклтә билә. 6Христос болхла Бурхна герт Көвүн мет итклтә болҗана. Кемр бидн зөргтә кевәр бәәһәд, Христост нәәләд батар зогсхла, бидн Бурхна гер болҗанавидн.Бурхна улсин төлә амрлһна орм
7Эн учрас Әрүн Сәкүсн иигҗ келҗәнә: «Эндр, Бурхна ду соңссн цагтан, 8көдәд сөрсн өдрт буцснла әдл бүдүн күзүһән бичә үзүлтн. 9Дөчн җилдән Мини керг-үүлмүд үзв чигн тедн Намаг тенд сөрдг билә. 10Эн учрар Би тер әмтнд уурлад келләв: Тедн Намаг оньдин дахҗ йовхар седхш, Мини келсн үгиг күцәхәр седхш. 11Тегәд чигн Би уурлад: Эдн Мини амрлһна ормд төрүц оршго, – гиҗ андһар тәвләв». 12Ахнр-дүүнр, оньган өгч саглтн: Тадн әмд Бурхиг үлдәшгоһар танад хар саната болн иткл уга зүркн бичә бәәтхә! 13Тадн дундас кен чигн күн килнцәр меклгдшгоһар, бүдүн күзүһән үзүлшгоһар, «эндр» гиҗ келәд бәәтл нег-негән өдр болһн урмдулҗ бәәтн. 14Кемр бидн экн түрүн авсн бәәдлән үкн-үктлән батар хадһлҗ бәәхлә, бидн Исус Христосла хамдан көдлдг улс болнавидн. 15Бурхна Бичгт: «Эндр Терүнә ду соңсад, буцлтын цагла әдл бүдүн күзүһән бичә үзүлтн», – гиҗ бичәтә. 16Кен Бурхна ду соңсҗ Бурхна өмнәс буцлт өргсмб? Египетәс Мошеһар дахулгдҗ һарсн улс. 17Дөчн җилдән кенд Бурхн уурлсмб? Көдәд өңгрсн килнцтә улст уурлсмн. 18Тедн Мини амрлһна ормд оршго гиҗ, кенә тускар Бурхн келҗ андһар тәвсмб? Бурхиг соңсдго улсин тускар келсмн. 19Тедн эс итксндән тиигәрән орҗ чадсн угаһинь бидн үзҗәнәвидн.
Copyright information for
XalIBTNT