‏ Hebrews 4

1Тегәд Бурхна амрлһна ормд орхит гисн Терүнә өгсн үг бәәтл, бидн терүнд орхас дутвзав гиҗ әәх зөвтәвидн. 2Яһад гихлә, бидн теднлә әдл Сән Зәңг соңславидн. Зуг тедн соңссн болв чигн тер үг тус күргсн уга. Яһад гихлә, тедн соңсв чигн итксмн уга. 3Бидн иткәд амрлһна ормд орҗанавидн. Яһад гихлә, «тедн Мини амрлһна ормд төрүц оршго», – гиҗ Бурхн келҗ. Терүнә керг-үүлмүд орчлң үүдсн цагт төгссн бийнь тиигҗ келҗ. 4Бурхна Бичгин нег һазрт доладгч өдрин тускар: «Бурхн доладгч өдрт цуг Эврәннь кергәсн амрв», – гиҗ бичәтә. 5«Тедн Мини амрлһна ормд төрүц оршго», – гиҗ Бурхна Бичгт бас бичәтә. 6Хамгин түрүнд Сән Зәңг соңссн улс эврәннь Бурхиг эс соңссндан амрлһна ормд орсн уга. Тегәд амрлһна ормд орх зәрм улс бәәсн төләд 7Бурхн «эндр» гидг өдр темдглсмн. «Эндр Терүнә ду соңссн цагтан бүдүн күзүһән бичә үзүлтн», – гиҗ кесг цаг давсн хөөн Тер Давидәр дамҗад урднь келсәр келв.

8Кемр Навина Исус теднд амрлһ өгсн болхла, Бурхн энүнә хөөн талдан өдрин тускар келш уга билә. 9Тегәд чигн Бурхна улст амрлһна өдр үлднә. 10Яһад гихлә, Бурхна амрлһна ормд орсн күн, Бурхн күцәсн көдлмшәсн амрснла әдл эврәннь күцәсн көдлмшәсн амрв. 11Тегәд эн амрлһна ормд орхар зүткхм. Яһад гихлә, Бурхиг соңсдго күн Израилин улсла әдл амрлһна ормд орҗ чадшго.

12Бурхна үг – әмд болн күцәмҗтә, тер ямаран чигн хойр талан хурц иртә үлдәс үлү хурц. Тер гүүнәр мана дотр ивтрҗ, сүмсн седкләс, нуһрсн яснас салһна. Тер күүнә зүркнә седвәр-санаг шүүнә. 13Нег чигн үүдәгдсн юмн Бурхнас бултҗ чадшго. Терүнә нүднд цугнь хуча уга секәтә. Терүнд бидн тооцаһан өгхвидн.

Исус алдр ах гелң

14Тегәд итксн юман батар түший. Яһад гихлә, теңгрт өөд болсн алдр ах гелң, Бурхна Көвүн Исус Христос манад бәәнә. 15Мана арһ угаг меддго, сана зовдго ах гелң гиҗ манад уга. Зуг Тер маднла әдл сөрлһнлә харһвчн, килнц һарһсн уга. 16Эн учрар Бурхна хәәрлтин ширәд зөргтәһәр өөрдий. Маднд дөң кергтә болсн цагт тенд бидн өршәлд күртҗ, хәәрлт олҗ чадҗанавидн.
Copyright information for XalIBTNT