Heb 5 | XalIBTNT | STEP | Бурхн ямаран чигн ах гелңгиг эврәннь келн-улсас шүүҗ авад, терүг келн-улсин нерн деерәс Бурхнд церглхин көдлмшт орулна. Ах гелң улсин килнцин төлә Бурхнд бәрц бәрәд, тәкл тәкнә.

‏ Hebrews 5

1 Бурхн ямаран чигн ах гелңгиг эврәннь келн-улсас шүүҗ авад, терүг келн-улсин нерн деерәс Бурхнд церглхин көдлмшт орулна. Ах гелң улсин килнцин төлә Бурхнд бәрц бәрәд, тәкл тәкнә. 2 Ах гелң бийнь арһ уга төләдән медл угаһар буру юм кесн улст сана зовҗ чадҗана. 3 Ах гелң арһ чинән уга төләд һанцхн әмтнә килнцин төлә биш, эврәннь килнцин төлә тәкл тәкх зөвтә.

4 Ах гелң болх ачиг күн эврә дурарн бийдән авх зөв уга. Зуг Бурхна дуудврар күн ах гелң болҗ чадна, тиигҗ Ааронла болв. 5 Тиим кевәр Христос чигн Бийнь Эврә дурарн ах-гелң болх ач авсн уга. Зуг Бурхн Терүнд: «Чи Мини Көвүнч, эндр Би Чини Эцк болв», – гиҗ келҗ. 6 «Чи Мелкицедклә әдл мөңкиндән гелң болхич», – гиҗ талдан кесгт келгдҗәнә.

7 Делкәд бәәсн цагтан Исус чаңһур хәәкрҗ ууляд зальврад, Бурхиг эрҗ сурсн билә. Бурхн Терүг үкләс харсҗ чадх билә. Исус Бурхиг номһн кевәр соңссн учрас Бурхн Терүг соңсв. 8 Исус Бурхна Көвүн болвчн зовлңгар дамҗад соңсхврта болдгар дасҗ. 9 Тегәд Бурхнд бүклдән Бийән нерәдәд, Тер Бийднь соңсхврта улсин мөңк аврлтын булг болв. 10 Тиигәд Бурхн Терүг Мелкицедклә әдл ах гелң болхич гиҗ тәвсмн.

Уха седкләрн деегшән өстн гисн дуудвр

11 Бидн энүнә тускар дала юм келх йоставидн, зуг тадн соңсдг арһан геесн учрар таднд цәәлһхд дегд күчр болҗана. 12 Яһад гихлә, цагар хәләхлә, тадн ода багш болх зөвтәт, зуг таднд шинәс Бурхна Үгин түрүн номиг дасхх кергтә. Акун хот идхин ормд ода күртл таднд үс уух кергтә. 13 Үс уудг күн болһн чик седклтә бәәдлин туск ном медхш, яһад гихлә, тер нилх болҗана. 14 Акун хот болхла дуту уга улст, яһад гихлә, тедн җирһлин дамшлтар му юмиг сән юмнас йилһҗ чадна.