‏ Hebrews 7

Мелкицедк гидг гелң

1Мелкицедк Шалимин хан болн Деед Бурхна гелң бәәҗ. Абрахам дөрвн хаадудыг диилснә хөөн хәрҗ йовтлнь Мелкицедк терүг угтад йөрәҗ. 2Абрахам болхла дәәләд авсн зөөрәсн арвдгч хүвинь терүнд өгч. Негдвәр, Мелкицедк гидг нерн «чик бәәдлин хан» гиҗ орчулгдна. Тер Шалимин хан болсн учрас терүнә нерн «эвин хан» гиҗ бас орчулгдна. 3Мелкицедкин эк-эцкин, уңг-тохмин, төрсн болн нас барсна өдрин туск нег чигн үг уга. Тер Бурхна Көвүнлә әдл мөңк гелң болҗана.

4Тер ямаран ик алдр бәәсинь тадн үзҗәнәт. Өвк эцк Абрахам дәәләд авсн зөөрин сәәнәснь арвдгч хүвинь өгч. 5Гелң болсн Левин тохмин үлдлмүд Закаһар Израилин улсин эс гиҗ эврәннь ах-дүүнрин авсн олзин арвдгч хүвинь авх йоста. Теднә ахнр-дүүнр Абрахамин тохмин үлдлмүд болвчн арвдгч хүвинь өгнә. 6Мелкицедк Левин тохмин үлдл биш билә. Зуг тер Абрахамас арвдгч хүвинь авад, Бурхна өгхәр бәәхиг авсн күүг йөрәсмн. 7Әдслдг күн әдс авчасн күүнәс деер болдг мөн. 8Нас бардг гелңгүд болхла арвдгч хүвиг авх зөвтә бәәҗ. Зуг Мелкицедкин тускар әмд бәәнә гисн герчллһн бәәнә. 9Тегәд арвдгч хүв авдг Леви бийнь Абрахамар дамҗад терүгән өгч. 10Яһад гихлә, өвк Абрахам Мелкицедклә харһсн цагла Леви түүнә дотрнь бәәсмн.

Мелкицедклә әдл талдан гелң

11Тегәд Левинхнә гелңгүдин церглтин тускар зааврмуд әмтнд өггдҗ. Болв кемр Левинхнә гелңгүдин церглт күслдән күрсн болхла, Ахарона әдл биш, Мелкицедклә әдл талдан гелң һарч ирх учр уга болх билә. 12Яһад гихлә, гелңгин церглт сольгдхла, Закан бас сольгдх зөвтә. 13Энд мана Деед Эзнә тускар келгднә. Тер талдан уңг-тохмта билә, тер уңг-тохмас күн гелң болҗ церглдго бәәҗ. 14Тер Йудан тохмас һарсн күн гиҗ ил медгднә. Моше гелңгүдин тускар келсн цаглаһан эн уңг-тохмин тускар келҗ уга.

15Талдан гелң Мелкицедклә әдл һарч ирсинь урднь келгдсн учрас цуг эн лавта медгднә. 16Уңг-тохмин туск зааврмудар болн тогтаврмудар тер гелң болсмн биш, зуг чилгч уга әмн җирһлин күчәр тиигсмн. 17Яһад гихлә, Бурхна Бичг иигҗ келҗәнә: «Чи Мелкицедклә әдл мөңкиндән гелң болхич».

18Арһ уга болн керг уга төләднь хуучн заавр уга кегднә. 19Яһад гихлә, Закан юуг чигн күслд авч ирсн уга. Ода болхла хамгин сән нәәлвр өггдҗ. Энүгәр дамҗад бидн Бурхн тал өөрдҗәнәвидн.

20Эн саамд Бурхна андһар бәәнә. Урднь талдан улс гелң болсн цагт андһар уга бәәҗ. 21Бурхн Исуст: «Деед Эзн, Чи мөңкиндән гелң болхич гиҗ андһар тәвәд, Эврәннь шиидврән сольшго», – гиҗ келв. Тер цагт Исус эн андһарар дамҗад гелң болҗ. 22Тиигәд Исус хамгин сән бооцана даалһгч күн болҗана.

23Нег халхаснь авад хәләхлә, Левинхнә гелңгүд дала бәәҗ. Яһад гихлә, тедн өңгрәд церглтән цааранднь давулҗ чадлго бәәцхәв. 24Хойрдгч халхаснь авад хәләхлә, Исус мөңкиндән бәәсн төләд гелң болсн Исусин церглт мөңк. 25Эн учрар Терүгәр дамҗад Бурхнд ирсн күн болһниг Тер аврҗ чадна. Яһад гихлә, Исус теднә төлә Бурхнас сурхар мөңкиндән бәәнә.

26Тиим ах гелң манад бәәх зөвтә: әрүн, нүл уга, бузрдад уга, килнцтә улсас йилһрдг, теңгр деер өөд болсн. 27Тер талдан ах гелңгүдлә әдл биш. Өдр болһн түрүләд Бийиннь килнцин төлә, дәкәд әмтнә килнцин төлә тәкл тәкх Терүнд керг уга. Яһад гихлә, Тер нег дәкҗ тәксмн, Бийәрн тәкл кесмн. 28Яһад гихлә, Закан арһ уга улсиг ах гелңгин көдлмшт орулна. Зуг Закана хөөн андһарлад тәвсн Бурхна өгсн үг Көвүг эн көдлмшт орулсмн. Бурхн Көвүг оньдиндән күслдән күрх арһта кев.