Heb 9 | XalIBTNT | STEP | Түрүңк бооцанд Бурхнд яһҗ сөгдхин тускар зааврмуд бичәтә бәәсмн. Энд чигн әрүн бәәрн бәәсмн.

‏ Hebrews 9

Һазрин болн теңгрин өмн сөгдлһн

1 Түрүңк бооцанд Бурхнд яһҗ сөгдхин тускар зааврмуд бичәтә бәәсмн. Энд чигн әрүн бәәрн бәәсмн. 2 Нег сег тәвгдсн бәәҗ. Терүнә һазак әңг әрүн бәәрн гиҗ нерәдгдлә. Тенд зулын тәвц болн ширә Бурхнд нерәдсн дееҗин өдмгтә бәәҗ. 3 Оңдан әңг һазак әңгәс хойр көшгәр салһгддг билә. Тернь хамгин әрүн бәәрн гиҗ нерәдгдҗ ^{▼▼Сүл халхст бәәсн Ерусалим балһсна сүмин зура хәләтн.}. 4 Хамгин әрүн бәәрнд күҗ уңһтхадг алтн ширә, алтар цутхсн бооцана хәәрцг бәәҗ. Бооцана хәәрцг дотрнь «манна» гидг хотта алтн сав, Ахарона цецгәрсн тайг болн бооцана дөрвлҗн хойр чолун бәәдг бәәҗ. 5 Бооцана хәәрцг деернь Херуб гидг нертә Бурхна элчнр зогсҗ. Тедн делсн җиврәрн килнц тәвлһнә орм хаадг бәәҗ. Ода энүнә тускар тодрхаһар келх цаг уга.

6 Цугнь иигҗ тосхата бәәҗ. Гелңгүд сегин һазак әңгднь орад, көдлмшән күцәдг бәәҗ. 7 Хамгин әрүн бәәрнд болхла һанцхн ах гелң җилд нег дәкҗ ордг зөвтә бәәҗ. Тер эврәннь болн әмтнә кесн буруһас көлтә тәклин цус авч ирдг бәәҗ. 8 Тиигәд һазак әңг бәәтл хамгин әрүн бәәрнд орх хаалһнь хаалһата гиҗ Әрүн Сәкүсн энүгәр үзүлдг бәәҗ. 9 Цуг үүнд өдгә цагин темдг бәәнә. Тер дотр: Бурхнд нерәдҗ өгдг бәрц болн тәкл күүнә уха-седклиг буйн төгс болһҗ чадшго. 10 Бәрц бәрлһн, тәкл тәклһн идх, уух юмна болн кесг цеврдүллһнә авъясмудла залһлдата. Цуг эн һадр талын зокалмуд. Бурхн шин диг-дараг тогтатл эдн олзлгдна.

11 Болв ирсн сәәһин ах гелң болҗ Христос ирсмн. Христос һазрин сегәс үлү ик алдр болн төгсвр сегәр орҗ һарв. Эн сег күүнә һарар кегдсн биш, үүдәгдсн орчлңгин нег әңг биш. 12 Христос хамгин әрүн бәәрнд нег дәкҗ орад оньдиндән үлдсмн. Текмүдин болн бухмудын цусиг биш, Эврәннь цусан авад маднд мөңк аврлт өгсмн. 13 Текмүдин болн бухмудын цусиг болн һалд шатагдсн туһлын үмсиг бузрдсн улс деегүр теднә цогциг цеврдүләд әрүлхәр цацдг бәәҗ. 14 Тиигхлә Христосин цусн яһҗ икәр цеврүлдх! Әрүн Сәкүсәр дамҗад Тер Бийәрн буру уга тәкл кеһәд Бурхнд өгсмн. Әмд Бурхнд церглҗ чадхин төлә мадниг Христосин цусн мана седклиг үклд орулдг йовдлмудас цеврүлх.

15 Бурхна дуудврар ирсн улс Терүнә өгхәр бәәсн үлдл зөөриг авх арһта болһхин төлә Христос Бурхна болн күүнә хоорндк Шин Бооцана орлцач болҗана. Тедн түрүңк Бооца батлсн цагт һарһсн килнцәсн сулдад, тер мөңк үлдл зөөриг авх.

16 Герәсн бәәхлә, герәсиг бичсн күн насан барх зөвтә. 17 Яһад гихлә, герәсиг бичсн күн насан бархла, герәсн күч авна. Болв герәсиг бичсн күн әмд бәәтл герәсн күч авшго. 18 Тиим учрас түрүңк Бооца ^{▼▼Грек келнә нег үг хойр чинр-утхта: бооцан болн герәсн.} цус олзлҗ батлгдсн билә. 19 Яһад гихлә, Моше закана зааврмуд әмтнә чирәд умшсн хөөн бухин болн текин цусиг авад, уснла холяд, Бурхна Бичг деер болн әмтнә деер цацв. Тер улан ноос болн хуссоп гидг урһмл олзлҗ цацсмн. 20 Моше иигҗ келсмн: Эн бооцана цусн. Эн бооцаг тадн күцәх зөвтәт гиҗ Бурхн зәрлг өгв. 21 Дәкәд тер Бурхна сег деегүр болн Терүнд сөгдҗ олзлдг савмуд деегүр цусиг әрүлҗ цацсмн. 22 Закаһар болхла ик зунь цусар цеврлгднә. Цус асхлго килнц тәвгддмн биш.

Христосин тәкл килнциг уга кенә

23 Тегәд теңгрин дүрәр кегдснь тиим кевәр цеврдгдх зөвтә. Зуг теңгрин юмст энүнәс сән тәкл кергтә. 24 Яһад гихлә, йосн әрүн бәәр дуралһҗ, күмни һарар кегдсн әрүн бәәрнд Христос орсн уга. Зуг Бурхна өмн мана төлә зогсхар Тер йосн теңгрт орсн бәәнә. 25 Ах гелң болхла хамгин әрүн бәәрнд җил болһн эврәннь цустаһан биш орна. Христос болхла кесг дәкҗ тәкл болхар теңгрт орсн уга. 26 Кемр эс тиигсн болхла Христос орчлң үүдсн цагас авн кесг дәкҗ зовагдад тәкл болх билә. Зуг Тер бийән тәклд өгсн учрас килнциг уга кехәр нег дәкҗ цагин чилгчд ирв. 27 Күн болһн нег дәкҗ үкәд, үкснә хөөн Бурхна зарһла харһх зөвтә. 28 Тиигҗ Христос кесг улсин килнц тәвхин төлә тәкл болҗ һарсмн. Әмтиг килнцәс цеврдүлхин төлә биш, Христосиг күләҗәсн әмтиг аврхин төлә Тер хойрдад ирх.