Phile | XalIBTNT

‏

Пилемон нернь туурсн христианин бәәҗ. Калост бәәх чонҗин гешүн чигн бәәсн болх эн, дәкәд Онәсм ялчин эзн. Ялч эврәннь эзнәс зулад, түүрмд суусн Павелта нег эвәрнь таньлдҗ. Онәсм Павелар дамҗад Христост иткдг күн болна. Тегәд Павел бичгтән Пилемониг эврәннь ялчтаһан эвцтхә гиҗ сурҗана. Онәсмиг тер хәрү йовулна. Пилемон терүг зуг буруһинь тәвҗ өгсн ялч кевтә биш, христианин болн ах-дүүһинь бәәдлтәһәр орулҗ автха гиҗәнә Павел.

Учр-утхин зура

Нүр үг 1–3

Пилемона төлә магтлһн 4–7

Онәсм төлә сурлһн 8–22

Товчлгч үг 23–25

‏ Philemon

1 – 2 Исус Христост итксн учрас суулһгдсн Павелас болн дү көвүн Тимофейәс маднла хамдан көдлҗ йовдг хәәртә Пилемонд, хәәртә дү күүкн Апьяд болн маднла әдл церглҗ йовх Архиппд, тана герт хурдг сүзгтнрт. 3 Бурхн мана Эцк болн Деед Эзн Исус Христос цугтаһитн хәәрлтхә. Би тадна амулң-төвкнүн бәәхин төлә зальврдв.

Пилемона иткл болн дурн

4 – 5 – 6 Күндтә дү көвүн, чи мини сананас кезәчн һархшич. Тиигәд зальврхларн, би эврәннь Бурхндан ханлтан өргдв. Яһад гихлә, чи Деед Эзн Исуст үнн седкләрн иткәд, иткдг улст дуран өгч күндлснә тускар би соңсв. Мини зальврлһна учр-утхнь иим: чи ма хойран үүрллһн маднд Христосас ач-тус күртәхин туск медрл медүлх. 7 Чини дурн намаг ик гидгәр байрлулҗ урмдулв. Юңгад гихлә, чи иткдг улсин зүрк төвкнүлвч.

Павелын сурвр

8 – 9 Тиигәд, чамд кех тоотыг зааҗ-закх нанд зөв бәәвв чигн, болв би чамд дурлсн учрас сурҗанав. 10 Би түүрмд суулһгдсн Исус Христосин элч Павел чамаг Онәсмин ^{▼▼Онәсм үгин чинрнь «туста».} тускар сурҗанав. Тиигхләрн Онәсм Христост иткәд мини зааҗ авсн көвүм болв. Би болхла түүрмд сууҗаһад, Онәсмд уха заадг эцк болв. 11 Урднь Онәсм чамд тус уга бәәҗ. Ода болхла, чамд, нанд кергтә күн болв. Тиигәд би Онәсмиг чам тал илгәҗәнәв. 12 Чи болхла, энүг орулҗ ав. Эн күн нанд әвр хәәртә. 13 Би Сән Зәңгәс көлтә сууҗаһад, Онәсмиг хаҗудан бәрхәр седҗәләв. Чини ормд нанд нөкд болх гиҗ санҗалав. 14 Болв би чамаг нанд нөкд бол гиҗ закхар седҗәхшв. Чи эврәннь санаһарн энүг кехч гиҗ би санҗанав. Кемр чи зөвән эс өгхлә, би төрүц юм кешгов. 15 Юңгад гихлә, тер хәрү мел чам тал ирхәр цаг зуур салсмн бәәҗ. 16 Ода болхла, тер чини эгл зарц биш, чини эңкр дү көвүн болҗана. Тер нанд йир хәәртә. Терүг күн гиҗ, сүзгч гиҗ, нанас давуһар чамаг хәәрлхиг би иткҗәнәв. 17 Тиигәд намаг эврәннь иньг гиҗ тоолҗахла, энүг нанла әдләр күндл. 18 Кемр тер чамаг һундасн болхла, эс гиҗ чамд өртә болхла, терүнә өринь би даанав.

19 Би, Павел, терүнә өринь бийдән авчанав гисн цаас бичәд, эврәннь һаран тәвҗәнәв. Чи эврәннь җирһләрн нанд өртәч, болв энүнә тускар нег чигн амн үг келшговидн. 20 Тиигәд, эңкр мини дү, Христосин төлә эн сән керг күцәһәд, намаг энүгәрн төвкнүл. 21 Мини сурҗасиг чи күцәхч гиҗ би нәәлҗәнәв. Нам терүнәс давуһар кехичнь.

22 Бас нег чамас сурҗах юмн иим: нанд нег хора бел кеһәд оркчк. Тана зальврлһна тусар би сулдад һархв. Һархларн тадн тал ирхв гиҗ би ицҗәнәв.

Сүл йөрәл

23 – 24 Чамд эврәннь мендән илгәҗәхнь: Исус Христост итксн учрас суулһгдсн Епапр, бас нанла хамдан көдлдг Марк, Аристарх, Дэм болн Лука. 25 Деед Эзн Исус Христос тадниг хәәрлтхә.