Rev 13 | XalIBTNT | STEP | Теңгсин усн дотрас долан толһата, арвн өвртә аң һарч ирсинь би үзв. Өвр болһнд титмтә, толһа болһнд Бурхиг муурулдг нерд бичәтә бәәҗ.

‏ Revelation of John 13

Хойр догшн аң

1 Теңгсин усн дотрас долан толһата, арвн өвртә аң һарч ирсинь би үзв. Өвр болһнд титмтә, толһа болһнд Бурхиг муурулдг нерд бичәтә бәәҗ. 2 Тер аң ирвскин бәәдлтә, көлнь аюһин көллә әдл, амнь арслңгин амнла әдл бәәҗ. Лу терүнд эврәннь күчән, әмтиг залх алдр йосан өгч. 3 Тер аңгин нег толһань үклин шавта бәәсинь би үзв. Зуг тер үклин шав эдгҗ. Энүг үзсн улс икәр өврәд аңгиг дахҗ. 4 Лу аңд эврәннь йосан өгсн учрас цуһар лууд сөгдҗ. Эн аңла кен әдлцхмб? Энүнлә кен дәәлдҗ чадхмб? – гиҗ цуһар аңд сөгдәд келцхәв. 5 Тер догшн аңд дөчн хойр сарин туршарт бийән буульх, Бурхна тускар му келх зөв өггдҗ. 6 Тегәд аң Бурхиг, Терүнә нериг болн бүүрлсн бәәриг, теңгрт бәәсн цуг юмсыг экләд харана. 7 Бурхна улсин өмнәс дә босхх, тедниг диилх зөв тер авч. Әәмг болһниг, келн-әмтн болһниг, келн болһниг залх йос тер авч. 8 Орчлңд бәәсн күмн әмтн терүнд сөгдх. Зуг әмн-җирһлин дегтрт орчлң үүдхәс өмн ^{▼▼Эн әмн җирһлин дегтр орчлң үүдхәс өмн алгдсн Хурһна дегтр мөн.} бичгдсн улс терүнд сөгдшго. Эн әмн-җирһлин дегтр алгдсн Хурһна дегтр мөн. 9 Соңсхар седснь соңстха! 10 Бәргдх зөвтә күн бәргдх, үлдәр алгдх зөвтә күн үлдәр алгдх. Бурхна улс тесвртә, итклтә болх зөвтә гиснь эн үгмүдәс медгднә. 11 Талдан догшн ик аңгиг би үзв. Тер аң Хурһнла әдл хойр өвртә бәәҗ. Лу кевтәһәр ду һарад, тер һазр дорас һарч ирв. 12 Тер түрүңк догшн аңгин чирәд терүнә йос олзлад, һазр деер бәәсн күмн-әмтиг эдгсн шархта түрүңк аңд сөгдүлв. 13 Тер аң алдр онц темдг үзүлҗ, әмтнә чирәд теңгрәс һал һарһад һазрт хайҗ. 14 Түрүңк аңгин өмн хойрдгч аң онц темдгүд үзүлҗ, әмтиг меклв. Тер аң һазрт бәәсн улст иигҗ закв:

– Үлдәр шавтгдад әмд үлдсн түрүңк аңгин дүрстә шүтә кетн! 15 Эн шүтән келхин төләд болн шүтәнд эс мөргсн улсиг алх зәрлг өгдг болхин төләд, түрүңк догшн аңгин шүтәнд әм орулх зөв хойрдгч аңд өггдв. 16 Нерн уга болн нертә, байн болн угатя, сул болн мухла цуг улс цугтаднь барун һартнь эс гиҗ маңнаднь тамһ күчәр тәвх зәрлг хойрдгч аң өгв. 17 Учрнь иим: тамһ уга күн юм хулдх, хулдҗ авх арһ уга болх. Тамһ гиснь: аңгин нерн эс гиҗ аңгин нернә то. 18 Энүг медхин төлә цецн ухата болх кергтә. Ухата күн аңгин тооһин чинр-утхнь медҗ чадх. Аңгин то – лавта күүнә тонь. Эн тонь: 666.