Revelation of John 19
Вавилон каарсна байр
1Энүнә хөөн теңгрин тоотнь олар цуглрсн мет шууга би соңсв. Тернь олн әмтнә дун: Бурхн тууртха! Мана Бурхн – Аврач! Мана Бурхн сүркә күчтә болн алдр! 2Энүнә зарһ – йосн болн үнн чик! Әмтнлә аля йовдл һарһад, теднәр хар йовдлыг күчәр келһүлдг олн меддг аля күүкд күүг Бурхн зарһла харһулла. Тер күүкд күн зарцнринь алсн учрас Бурхн терүг цааҗв! 3Тедн дәкн хәәкрцхәв: – Бурхн тууртха! Эн шатаҗах балһсна һалын утан мөңкиндән деегшән һарх. 4Хөрн дөрвн көгшә болн әмтә дөрвн юмн элкдҗ унад, ширәд суусн Бурхнд сөгдцхәв. – Тиигтхә! Бурхн тууртха! – гиҗ тедн келцхәв.Хурһна хүрм
5– Нертәнь, нерн угань, цугтан Бурхнд церглдг болн Терүг күндлдг улс мана Бурхиг туурултн! – гисн дун ширә талас һарчахинь би соңсв. 6Тиигхлә олн улсин дун мет, ик күркрәнә шууган мет, оһтрһу мет дун иигҗ келсинь соңсв: – Бурхн тууртха! Мана сүркә күчтә Бурхн залдг болв! 7Хурһна хүрмин цаг ирв, Терүнә күүкн бийән белдв. Цуһар байсҗ байрлтха! Бурхиг туурултха! 8Күүкнд цевр гилвксн хувц өгсмн. Хувцн гиснь – Бурхна улсин цаһан йовдлмуд. 9Дәкәд Бурхна элч нанд иигҗ келв: – Бичҗ ав! Хурһна хүрмин нәәрт дуудгдснь буйн кишгтә! Дәкәд немв: – Эн йосн Бурхна үгмүд. 10Би терүнд сөгдхәр көлднь унв. – Бичә тииг! Би чамла әдл, Бурхнд иткдг чини ахнр-дүүнрлә әдл зарцв. Тедн Исусин сексн үнниг дахҗ йовна. Тер учрар Бурхнд сөгд! – гиҗ Тер келв. Яһад гихлә, Исусин сексн үнн әәлдәчнрт әәлдх арһ өгнә.Цаһан мөртә күүнә тускар
11Теңгр заагрхла, би цаһан мөр үзв. Мөрн деер суусн күн Итклтә болн Үннч. Үнн-чик кевәр зарһ кеҗ Тер дәәлдг билә. 12Тер шачах һал мет нүдтә, толһа деернь кесг титмтә. Деернь бийәсн нань күн меддго нерд бичәтә. 13Цуснд будгдсн хувц тер өмссн бәәҗ. Нернь – Бурхна Үг. 14Цевр, гилвксн цаһан хувц өмссн, цаһан мөрд унсн теңгрин цергүд ардаснь йовна. 15Амнаснь хурц иртә үлд үзгднә. Тер үлдәрн буру номта улсиг диилх. Төмр тайгарн тедниг залх, сүркә күчтә Бурхна цухлын алдр һазрт болн уста үзм дардг уста үзм көләрн шахх. 16Терүнә хувцн деер болн һуйднь: Хаадудын Хан, Эздүдин Эзн гидг нерн бичәтә. 17Би нарн деер зогсҗах Бурхна элчиг үзв. Тер теңгр деер нисҗ йовсн шовудт чаңһ дууһарн хәәкрв: – Наартн, цуһар Бурхна алдр нәәрт нисҗ иртн! 18Хаадудын, миңһн цергин толһачнрин, цергүдин, мөрдин болн мөртә улсин, сул болн зарцнрин, нертә болн нерн уга, цуг улсин күш идхәр наартн! 19Тиигхлә би догшн аңгиг болн һазрин хаадудыг цергтәһинь үзв. Тедн цаһан мөрн деер Суусна өмнәс, Терүнә цергин өмнәс дәәлдхәр цуглрҗ. 20Болв догшн аң болн худл әәлдәч бәргдв. Тер худл әәлдәч догшн аңгин өмн өвәрц йовдлмуд үзүлдг бәәҗ. Тер өвәрц йовдлмударн догшн аңгин тамһта болн терүнә дүрстә шүтәнд мөргдг улсиг меклдг бәәҗ. Догшн аң болн худл әәлдәч күкрәр шатҗасн нуурт әмдәр хайгдв. 21Мөрн деер суусна амнас һарчасн үлдәр догшн аңгин церг алгдҗ. Цуг шовуд теднә күшмүдиг цадтлан идцхәҗ.
Copyright information for
XalIBTNT