Rev 20 | XalIBTNT | STEP | Теңгрәс бууҗ йовх Бурхна элчиг би үзв. Һартан тер йорал уга худгас түлкүр болн күнд цев бәрҗ.

‏ Revelation of John 20

Миңһн җил

1 Теңгрәс бууҗ йовх Бурхна элчиг би үзв. Һартан тер йорал уга худгас түлкүр болн күнд цев бәрҗ. 2 Бурхна элч көгшн моһаг Гемшәч, болн Өшәтн гидг лууг бәрҗ авад күлв. Тер миңһн җилдән күләтә бәәх. 3 Терүг йорал уга гүн һазрт хаяд, үүдинь төдгләд, тамһ тәвҗ. Бурхна элч терүг күмни улсиг бичә меклтхә гиҗ миңһн җилин туршарт тиигҗ суулһҗ. Энүнә хөөн тер ахрхн цагт сулдхгдх. 4 Би зарһ кех йоста ширәс деер суусинь үзв. Исусин тускар келснәс болн Бурхна үг тархаснас көлтә хәәчлә харһулгдсн улсин сүмсд үзв. Тедн догшн аңд болн терүнә дүрстә шүтәнд мөргсн уга, терүнә тамһиг маңнадан болн һартан тәвүлсн уга. Тедн әмдрәд, Бурхна илгәсн Аврачла хамдан миңһн җилд нойлҗ йовла. 5 Наадк үксн улс миңһн җил давад уга бәәтл әмдршго. Эн үксн әмтнә түрүңк әмдрллһн. 6 Эн цагт әмдрллһнд орлцсн күн буйн кишгтә. Эдн Бурхна улс. Эдн хойрдгч үкллә харһшго. Бурхна болн Христосин гелңгүд болҗ, эдн Терүнлә хамдан миңһн җилд залх.

Эрлгиг диилснә тускар

7 Миңһн җил давсна хөөн эрлг бәрәнәсн сулдхгдх. 8 Цуг һазрт бәәсн келн-улсиг меклхәр тер һарх. Тер улсин нерн Гог Магог хойр. Эрлг тедниг дәәлхәр цуглулх. Тооһарн тедн теңгсин элсн мет олн болх. 9 Тедн һазрар тарад, Бурхна улсин һазриг болн Бурхна дурта балһсиг бүслх. Зуг теңгрәс һарсн һал тедниг кевтнь шатаһад алх. 10 Дәкәд тер улсиг меклсн эрлг күкрәр шачасн нуурт хайгдх. Догшн аң болн худл әәлдәч бас тенд хайгдх. Тедн өдр сө уга мөңкиндән тенд зовагдх.

Сүл зарһ

11 Ик цаһан ширә болн ширә деернь Суусиг би үзв. Теңгр һазр хойр терүнә өмн уга болҗ одв. Дәкҗ күн тедниг үзсн уга. 12 Нертә, нерн уга үксн улсиг ширән өмн зогсҗасинь болн дегтрмүд секәтәһинь би үзв. Дәкәд талдан дегтр секәтә бәәҗ. Тернь әмн-җирһлин дегтр. Үксн улс дегтрмүдт бичгдсн теднә кесн йовдлмударнь зарһла харһулгдсн бәәҗ. 13 Теңгсин дотр бәәсн үксн улсиг усн һарһҗ өгв. Үкл болн Үклин һазрт бәәсн үксн улсиг һарһҗ өгв. Күн болһн кесн йовдларн зарһла харһулгдв. 14 Энүнә хөөн Үкл болн Үклин һазр һалта нуурт хайгдв. Һалта нур гиснь: хойрдгч үкл мөн. 15 Әмн-җирһлин дегтрт нернь эс бичгдсн күн болһн һалта нуурт хайгдв.