Rev 5 | XalIBTNT | STEP | Тиигхлә би Суусна барун һартнь хойр таласнь бичәтә, долан тиизтә цаас үзв.

‏ Revelation of John 5

Орачксн цаасн болн Хурһн

1 Тиигхлә би Суусна барун һартнь хойр таласнь бичәтә, долан тиизтә цаас үзв. 2 Йос бәрсн Бурхна элчиг:

– Тиизиг эвдҗ задлх, цаасиг секх зөвтә күн бәәнү? – гиһәд чаңһ дууһарн келҗәсинь би үзв.

3 Зуг теңгр, һазр деер, һазр дор чигн тер цаасиг күн секҗ чадсн уга. 4 Тер цаасиг секәд умшх күн уга болсн учрас би һашудҗ оркрҗ бәәләв. 5 Тиигхлә көгшәсин дундас негнь:

– Бичә ууль, хәлә! Йудан тохмас һарсн арслң, Давидин үлдл тохм диилвр бәрҗ. Тер долан тииз эвдҗ задлх, цаасиг секҗ чадх, – гиҗ нанд келв.

6 Ширән өөр зогсҗасн Хурһиг би үзв. Терүг әмтә дөрвн юмн болн көгшәс эргҗ зогсҗ. Тер тәклд тәкгдсн хурһна бәәдлтә бәәҗ, долан өвртә, долан нүдтә бәәҗ. Долан өвр болн долан нүдн гиснь: һазр болһнд илгәгдсн Бурхна долан Сәкүсн. 7 Хурһн өөрдәд, ширә деер Суусна барун һарас цаас авв. 8 Терүг цаас авсна хөөн дөрвн әмтә юмн болн хөрн дөрвн көгшәс Хурһнд сөгдцхәв. Көгшәс тус-тустан һартан ятх, саңгин идәһәр дүүрң ааһ бәрсн бәәлә. Саңгин идәһәр дүүрң аһ гиснь: Бурхна улсин мөргүл. 9 Тедн шин дууһан дуулцхав:

– Цаас авад тиизинь задлх зөв Танд бәәнә. Яһад гихлә, Та тәкл болад Эврәннь цусарн Бурхнд 10 тохм болһнас, келн болһнас, келн-әмтн болһнас әмтиг хулдҗ авлат. Та теднәр Бурхна гелңгүд болсн улс тедн һазриг залх.

11 Тиигхлә би хәләһәд ширән эргнд тоолҗ болшго Бурхна элчнрин, әмтә дөрвн юмсын болн көгшәсин ду соңсв: 12 Тәклин алгдсн Хурһн цецн уха, байн зөөр, күч, йос бәрх ачта! Терүг улс туурулх, күндлх йоста! 13 Теңгр, һазр деер, һазр дор, теңгст бәәсн әмтә киитә тоотнь, цуг орчлңд бәәсн тоотнь иигҗ келсинь би соңсв: Ширәд Сууснь болн Хурһна күч-йос Бәрснь тууртха! Мөңкиндән Тедниг күндлтхә! 14 Әмтә дөрвн юмс: Тиигтхә, – гиҗ келв. Тиигхлә көгшәс сөгдҗ мөргцхәв.