2Ch 35:20-36:1 | ZomZIV | STEP | Hihte khempeuh khit Josiah in biakinnpi a ngei a batsak khit ciangin Euphrates gei-a Carchemish ah do dingin Egypt kumpipa Neco kuanto a, amah tawh gal kido dingin Josiah a kuankhia hi.

2 Chronicles 35:20-27

Josiah Sihna

20 Hihte khempeuh khit Josiah in biakinnpi a ngei a batsak khit ciangin Euphrates gei-a Carchemish ah do dingin Egypt kumpipa Neco kuanto a, amah tawh gal kido dingin Josiah a kuankhia hi. 21 Ahi hangin Neco in ama tungah kamtai sawl a, “Judah kumpipa aw, nang le kei kikalah i kitot nading bang om ahi hiam? Tu hunin nang sim dinga hong kuan hi loin ka galte innkuan sim ding ka hizaw hi. Pasian in ka kinawh ding hong gen khin hi; kei hong ompih Pasian na langpanna khawl in; na khawl kei leh nang hong susia ding hi,” a cisak hi. ^a

22 Ahi zongin Josiah kileh kik nuam lo a, gal sungah amah tawh kido dingin a meel a seel hi. Amah in Pasian thupiak Neco gensa ngai nuam lo a, Megiddo zanglei ah amah tawh kido dingin a kuan hi. ^b

23 Thal tawite in Kumpi Josiah kap uh a, amah in a uliante kiangah, “Hong paikhiatpih un; ka nak liam mahmah hi,” a ci hi. 24 Tua ciangin amaute in a leng sung pan amah lakhia uh a, leng dang khatah koihin Jerusalem ah puak uh a, tua lai-ah a si hi. Amah a pate hanah kivui-a, Judah le Jerusalem khempeuh ama hangin a thum uh hi. ^c

25 Jeremiah in Josiah tamlawhnate phuaka, numei le pasal lasate in a taamlawh uh ciangin tuni dong Josiah a kahtap uh hi. Hihte Israel ah tang ngeina suaka tamlawhna ah a kigelh hi.

26 Josiah in a uk sung thupiang dangte le TOPA Thukham sunga kigelh tawh kizui-in ki-ap a, a septe - 27 a nasep khempeuh a kipatna pan a tawpna dong Israel le Judah kumpite laibu sungah kigelh hi.

2 Chronicles 36:1

1 Tuateh a gam mite in Josiah tapa Jehoahaz la in Jerusalem ah a pa tangin kumpi a suaksak uh hi. ^d