2Ki 22:1-10 | ZomZIV | STEP | Josiah kumpi a suahin a khan kum giat pha a, Jerusalem ah kum sawmthum le khat sung a uk hi. A nu min Jedidah hi a, Adaiah tanu hi-in; Bozkath pan ahi hi.

2 Kings 22:1-10

Thukham Laibu Kimu

1 Josiah kumpi a suahin a khan kum giat pha a, Jerusalem ah kum sawmthum le khat sung a uk hi. A nu min Jedidah hi a, Adaiah tanu hi-in; Bozkath pan ahi hi. 2 Amah TOPA mit ah thumaanin gamta-a a pa David lampite khempeuh tawnin veilam le taklam ah a pial kei hi. ^a

3 A uk khit kum sawm le giat kumin Kumpi Josiah in Meshullam tapa, Azaliah tapa Shaphan, thuvanpipa TOPA biakinnpi ah a paisak hi. Amah in: 4 “Tulpipa Hilkiah kiangah paito inla, kongcingte in mite tunga a khopsa, TOPA biakinnpi-a kipuak sumte a baihsa in omsak in. 5 Biakinnpi sepna ah a van dinga kisehte tua sumzeek in. Tuateh hih mite in TOPA biakinnpi a puahpha nasemte - 6 khutsiamte, inn lamte le suang ciangte piasawnsak in. Amaute in biakinnpi a puah nadingun sing le suang zepsa zong leisak in. 7 Amaute in muanhuaitakin na sem uh ahi manin amau tunga ki-ap sumte sazian neih a kul kei hi,” a ci hi.

8 Tulpi Hilkiah in thuvanpipa Shaphan kiangah, “TOPA biakinnpi sungah thukham Laibu ka mu hi,” a ci hi. Amah in Shaphan pia-a, a sim hi. 9 Tua ciangin kumpipa kiangah thuvanpipa Shaphan pai-in: Na uliante in TOPA biakinnpi sunga om sumte biakinnpi semte le a vante tungah a piakhia khin uh hi,” ci-in a zasak hi. 10 Tua ciangin thuvanpipa Shaphan in kumpipa kiangah, “Siampi Hilkiah in kei laibu khat hong pia hi,” ci-in a theisak hi. Tuateh Shaphan in kumpipa omin a sim hi. ^b