2Ki 25:1-12 | ZomZIV | STEP | Tua ciangin Zedekiah in a uk a kum kuana, a kha sawmna a ni sawmna ni-in Babylon kumpipa Nebuchadnezzar, Jerusalem sim dingin a galkap buppi tawh a kuan hi. Amah in khuapi pua-ah giahphual sat-a a kimkot tengah umcihna a bawl hi.

2 Kings 25:1-12

1 Tua ciangin Zedekiah in a uk a kum kuana, a kha sawmna a ni sawmna ni-in Babylon kumpipa Nebuchadnezzar, Jerusalem sim dingin a galkap buppi tawh a kuan hi. Amah in khuapi pua-ah giahphual sat-a a kimkot tengah umcihna a bawl hi. 2 Zedekiah uk a kum sawm le khatna dong khuapi ki-um cip hi. 3 A kha lina ^{▼▼25.3 Jer 52:3 en in} a ni kuana ni-in khuapi sungah kialpi nasia tun lua ahi manin mite nek ding an a om kei hi. 4 Tua ciangin khuapi kulh kitovang a, Babylon-te ^{▼▼25.4 Ahikeh Chaldea-te tg.13, 25 le 26 ah zong} in kulh a umcih uh hangin kumpipa huan gei-a kulhte gel kikal tawnin galkap buppi zanin a taikhia uh hi. Amaute Arabah ^{▼▼25.4 Ahikeh Jordan kuam} lam manawhin a tai uh hangin, 5 Babylon-te ^{▼▼25.5 Ahikeh Chaldea-te tg.10 le 24 ah zong} in kumpipa nungdelh uh a, Jericho zangleite ah a pha uh hi. A galkapte khempeuh ama kiang pan kikhenkhia in kithehthang uh a, 6 amah kiman hi. Amah Libnah a Babylon kumpipa kiangah kipuak a, tua lai-ah ama tungah thu a kikhen hi. 7 Amaute in Zedekiah tapate ama muhin a that uh hi. Tua ciangin a mitte khelkhia uh a, sumngo kol bulhin Babylon ah a paipih uh hi.

8 Babylon kumpipa Nebuchadnezzar a kum sawm le kuana, a kha ngana, a ni sagihna ni-in Babylon kumpipa ulian khat ahi amah cingte ukpa Nebuzaradan Jerusalem ah a pai hi. 9 Amah in TOPA biakinnpi, kumpi-inn le Jerusalem a inn khempeuh mei-in a hal hi. Inn thupi peuhmah a haltum hi. 10 Kumpi cingte ukpa khutnuai-a Babylon galkap buppi in Jerusalem kimkot ah kulhte a phelkhia uh hi. 11 A cingte ukpa Nebuzaradan in khuapi sunga a om lai mite, mi omlai peuhmah le Babylon kumpipa tungah tokaisate khempeuh tawh salin a kai khawm hi. 12 Ahi hangin a ukpa in lote le lenggui-lote a kho dingin gammi a zawng pente pawlkhat a nusia hi. ^e