Exo 21:1-11 | ZomZIV | STEP | Hihte in amaute mai-a na koih ding thukhamte ahi hi:

Exodus 21:1-11

1 Hihte in amaute mai-a na koih ding thukhamte ahi hi:

Hebrew Nasemte

2 “Hebrew nasem khat na lei leh amah in kum guk sung nang na a sem ding hi. Ahi hangin a kum sagihna ah amah in bangmah pia loin suakta ding hi. 3 Amah a guak-a hong pai ahileh, amah guak mah kikhahkhia ding hi; hong pai lai-in zi a neih le tuanu in amah a zui ding hi. 4 A pu in zi a neihsak-a, tuanu in tanu tapa a neih leh a numei le a tate a pu aa hi dinga, a pasal bek suakta ding hi. ^a

5 “Ahi hangin nasempa in, “Ken ka pu le ka zi ka tate ka it hi; ka suakta nuam kei hi,” ci-a a khensat leh 6 tua ciangin a pu in pel loin thukhente ^{▼▼21.6 Ahikeh Pasian mai-ah} kiangah a paipih ding hi. Amah in kongkhak mungah dinga tukkilh khatin a bil a vuhsak ding hi. Tua ciangin amah a nuntak sungteng a sila a suak ding hi.

7 “Mi khatin nasem dingin a tanu a zuak leh, nasem pasalte bangin amah a suak ta thei kei ding hi. 8 Amah a teel ^{▼▼21.8 Ahikeh a pu in amah teel lo ahi ciangin} a pu lungsim a tuah zawh kei leh a mah in tuanu a kitankiksak ding hi. Amah tuanu tungah muanhuai lo ahih manin gamdangte tungah zuak theih nading thu a nei kei hi. 9 Amah in a tapa adinga a teel ahileh amah in tuanu a tanu khat zahin a koih ding hi. 10 Amah in numei dang a pi leh a zi masa pen annek, puansilh le nupa hihna a beisak kei ding hi. 11 Amah in hih na thumte amah a piak kei leh sum bangmah piak kul loin a suaktasak ding hi.