Exo 28:15-28 | ZomZIV | STEP | “Thukhensatnate bawl nadingin awmtuam khat zem in - khutsiampa bawl hi ding hi. Siampi puan-ak bangin: kham, adum, adupsan, a-ausan khau le limtaka kikhuka kigan puan tawh bawl in.

Exodus 28:15-28

Awmtuam

15 “Thukhensatnate bawl nadingin awmtuam khat zem in - khutsiampa bawl hi ding hi. Siampi puan-ak bangin: kham, adum, adupsan, a-ausan khau le limtaka kikhuka kigan puan tawh bawl in. 16 A ningkim hi dinga - khap ^{▼▼28.16 Tua pen khutpi 9 bang 9 centimeter 22 bang)} khat sau-in khap khat zai-in - khep nihin kikhep ding hi. 17 Tua ciangin a tungah suangmanpha gual li-in suang in. A gual masa pen ah ruby khat, topaz khat, le beryl khat; 18 a gual nihna ah turquoise khat, sapphire ^{▼▼28.18 Ahikeh lapis lazuli} khat, le emerald khat; 19 a gual thumna ah jacinth khat, agate khat, le amethyst khat; 20 a gual lina ah chrysolite khat, onyx khat le jasper ^{▼▼28.20 Hih suang manphate a manphatna kicianlo hi.} khat hi ding hi. Kham geihualte sungah tuate suang in. 21 Suang sawm le nih hi dinga, khat Israel’ tapate’ min khat gelhna hi-in seal bangin kikhuakin nam sawm le nihte min khat ciat kigelh ding hi. ^d

22 “Awmtuam-a dingin khauhual bangin kham citak khainiang kiphek bawl in. 23 Tua adingin kham kual nih bawl inla tuate awmtuam kiu nih ah khihkip in. 24 Awmtuam kiu-a kham kualte ah khainiang nihte khihkip inla 25 tua khainiang mong langkhat pen siampi puan-ak liangkaihna a ang lampanga, a liangko-a kaisuk pen tawh zom in. 26 Kham kual nih bawl inla siampi puan-ak tawh kizom awmtuam sunglam kiu nihte ah bulh in. 27 Kham kual nih mah bawl inla, siampi puan-ak anglam a, a liangkaih na taw-a apang khuina kiang kawnggak pek tung santakah bulh in. 28 Awmtuam sikkualte le siampi puan-ak sikkualte khaudumin khihkhawm inla, awmtuam pen siampi puan-ak pana kiveikhiat loh nadingin kawnggak tawh khihcip in.