Eze 37:1-14 | ZomZIV | STEP | TOPA khut ka tungah hong kinga a, TOPA Kha in kei hong paikhiatpihin kuam laizang khatah hong omsak hi; tua kuam ah guhsia bekbek a om hi.

Ezekiel 37:1-14

Guhkeu Kuam

1 TOPA khut ka tungah hong kinga a, TOPA Kha in kei hong paikhiatpihin kuam laizang khatah hong omsak hi; tua kuam ah guhsia bekbek a om hi. 2 Amah in tuate lakah kei hong vakpih kawikawi a, tua kuam sungah guh tampitak kiphah ziahzuahin tua guhte a keu giugeu hi. 3 Amah in kei kiangah, “Mihing tapa aw, hih guhte a nungta thei ding hiam?” ci-in hong dong hi.

“Thupipen TOPA aw, nang bek in na thei hi,” ka ci hi. ^a

4 Tua ciangin kei kiangah, “Hih guhte tungah thu genkhol inla amaute kiangah, ‘Guhkeute aw, TOPA gen za ta un! 5 Hih guhte tunga Thupipen TOPA thugen hih ahi hi: Na sungah huu ^{▼▼37.5 Hebrew in hih kammal huih ahikeh kha cihna zong ahi hi. (tg.6-14 en in)} ka lutsak dinga na nungta ding uh hi 6 Note tungah thagui ka thuah dinga satak dimsakin vunin kong tuam ding hi; note sungah huu ka lutsak dinga tua ciangin na nungta ding uh hi. Tua ciangin keimah TOPA ka hilam nong thei ding uh hi,’ ci in,” hong ci hi. ^c

7 Tua ciangin hong kisawl bangin thu ka genkhol hi. Ka thugen hun sungin a gamlum khat hong om a kitat luapluapin guhte amau mun ciatah a kithuah uh hi. 8 Ka et leh tuate tungah thagui le satak hong kithuah a, vun in a tuam hi, ahi hangin amaute sungah huu a om nai kei hi. ^d

9 Tua ciangin kei kiangah, “Huu tungah thu gen in, mihing tapa aw, thu gen inla tua tungah,’ Hih in Thupipen TOPA gen ahi hi: Huu aw, huih kiuli panin hong pai inla hih a sisate a nuntak theih nadingin a sungah lut in,’ ci in,” hong ci hi. 10 Ama hong sawl bangin thu ka gena amaute sungah huu a lut hi. Amaute nungta uh a, a khe-un a ding uh hi- galkap honpi khat ahi hi. ^e

11 Tua ciangin amah in kei kiangah: Mihing tapa aw, hih guhte Israel innkuan bup ahi hi. Amaute in, ‘Ka guhte uh keugaw a, ka lametna uh beita hi; kote hong kikhenkhia ta hi,’ ci uh hi. 12 Tua ahi ciangin thu gen inla amaute tungah: Hih in Thupipen TOPA gen ahi hi: Ka mite aw, na hankhukte uh ka hong dinga tuate panin kong lakhia to ding hi; note Israel gamah kong puak kik ding hi. 13 Na hankhukte uh honga kong lakkhiattoh ciangin keima mi note in keimah TOPA ka hilam nong thei ding uh hi. 14 Ka Kha note sungah ka koih dinga nungta-in na gamuah kong tengsak ding hi. Tua ciangin keimah TOPA in ka gensa a sem ka hilam nong thei ding uh hi, TOPA in cikhia hi,’ ci in,” hong ci hi. ^f