Jer 49:7-22 | ZomZIV | STEP | Edom tawh kisai-in: Hih in Thahatpen TOPA gen ahi hi: “Teman ah pilna om nawn lo ahi hiam? Thudotte in a ngaihsut siamna uh mangsak ta uh ahi hiam? A pilna uh muat ta ahi hiam?

Jeremiah 49:7-22

Edom Tawh Kisai Thupuak

7 Edom tawh kisai-in: ^a

Hih in Thahatpen TOPA gen ahi hi:

“Teman ah pilna om nawn lo ahi hiam? ^b
Thudotte in a ngaihsut siamna uh mangsak ta uh ahi hiam?
A pilna uh muat ta ahi hiam?
8 Esau ka tuahsak hun ciangin ama tungah
gimna tungsak ding ka hi manin,
no Dedan a tengte aw,
lehtai unla suanghawm thukpi-ah bu un.
9 Lenggah lo mite no kiangah hong pai uh leh
lenggah tawmkha beek nusia lo ding uh ahi hiam?
Zanin gutate hong pai leh
amau deihzah bek gu ding uh hilo ahi hiam?
10 Ahi hangin Esau ka vunhawktol dinga,
amah le amah a kisel theihloh nadingin
a bukna munte ka lemkhia ding hi.
A tate, a kinaipihte le a vengte mangthang dinga,
amah zong a om nawn kei ding hi.
11 Na tagahte nusia-in amau nuntakna ka hu ding hi.
Na meigongte un zong kei hong muang thei uh hi,” a ci hi. ^c

12 Hih in TOPA gen ahi hi: “Dan thuakna hai a dawn lo dinga kilawmte nangawn in pello-a dawn ding ahileh bang hangin nang in dan tuak loin om thei ding na hi hiam? Dan thuak loin na om kei dinga na dawn pelmawh ding hi.” 13 TOPA in cikhia hi, “Kei le kei ka kiciama, Bozrah kisia dinga a kilipkhap, a kisimmawh le a kihamsiat suakin a khuapite a kisia den ding hi,” a ci hi.

14 TOPA tung pan thupuak ka za khina:
Minamte kiangah thupuak khat kisawlin,
“Gal do dingin no le no kikaikhawm un!
Gal sim dingin ding un!” kicisak hi.
15 “Tu-in minamte lakah kong neusek dinga,
mite lakah kong kisimmawhsak ding hi.
16 No suangpi henga tengte,
mualsangte tung a luahte aw,
a lauhuai na ngaihsut lianpi uh le
na lungsim kisaktheihna un no hong khem hi.
Muvanlai aa zah-a sangin
na bu na tom hangin tua lai panin nang kong kaikhiasuk ding hi,”

TOPA in cikhia hi.
17 “Edom, mite lipkhap khat suak ding uh a;
a tawnkha khempeuh in a liamnate khempeuh hangin
mullitin a selpho ding uh hi.
18 Sodom le Gomorrah
a khuaveng khuapite tawh a kilotthal bangin ^d
tua lai-ah kuamah teng loin
mihing ta a om kei ding hi”

TOPA in ci hi.
19 “Jordan gamphalak panin lono hoihna gamah ^e
humpinelkai a paikhiat toh bangin
thakhatin a gam pan Edom ka delhkhia ding hi.
Hih a ka sepsak ding kua ka teel ding hiam?
Kei tawh a kibang kua hi a, kua in kei hong to ngam ding hiam? ^f
Tuateh kei langkhatah bang tuucingpa pang thei ding ahi hiam?” a ci hi.
20 Tua ahi ciangin TOPA in Edom tungah tunsak dingin a ngimsa; ^g
le Teman a tengte tungah tunsak a sawmte za in: ^h
A ganhon no neute kituahmangsak dinga; ⁱ
amaute hangin amah in amaute lonona mun a susiamang ding hi. ^j
21 Amaute pukna awging hangin leitung kiling dinga;
amaute kah na in Tuipi San ^{▼▼49.21 Hebrew in Yam Suph tua pen Pumpeng Tuipi cihna} a thawn ding hi. ^l
22 En un! Muvanlai khat sanglen toin
Bozrah tungah a kha zalin a bawhsuk ding hi. ^m
Tua ni ciangin Edom galhangte lungsim, ⁿ
numei nausuak kuante lungsim bang ding hi. ^o