2 Corinthians 2

Faulo tamu yana leta 'wainega me Kolinita i awavesakoyedi.

Basenadi a waiga a awavesakoyemi yami sauluva faifaidi 'wa nuavita. Bega yaku nuanua a vo, Tutuya de'e kebu wata a na nagoga, kebu nuanuaku yaku awavesako 'wainega wata i na nuavita.” 'Omi 'aku tokiavesosoana, 'ai'edi a da awavesakoyemi yami sauluvanidi faifaidi nuami a da 'ivevitadi nika yau wata a da nuavita. 'Wa da nuavitaga kebu tamu wata aitoi i da miamia bega i da kiavesosoaniku. Begaidi tamu leta a kilumi i wai 'waimie a awavesakoyemi yami sauluva sakoidi faifaidi. I lubwainemi 'wa da kiavesosoaniku bega nuanuaku nagami yami sauluva i na ve'atumai, mulieta tutuyanina a na waiga, kebu a na nuavita a na sosoana faifaimi. 'Omi matatabumi a 'asetami, a nuani mogitana 'ai'edi a na wai ma yaku sosoana a na veluagami, 'omi matatabumi wata 'wa na sosoana. Fai nuanuaku taiadi ta na sosoana ma yaku nuavita wata ma yaku venuafouviga, ma matageuku a kiluma 'waimie. A kilumaga, kebu nuami 'adi 'ivevita faifaina, we'e mogitana a kiluma bega 'wa na 'asetai a nuakalikaliemi bwaikina.

  • S1 1 Kol 4:21S4 2 Kol 7:8-9

Faulo i veifufu tamu tosakona faifaina.

Nuanuaku a na veifufu tomogonina nuada i kiavenuavitadiga faifaina. Fai taunina tamu iami yau kebu 'aiseku yana sauluva faifaina a da nuavita, 'omi wata sai'afo 'wa nuavita. Siwe kebu nuanuaku yana bunumayaga a na 'ivebwaiki, begaidi kebu wata faifaina a na vona. 'Akonadi sai'afo matatabumi vematavuloga 'wa veleni yami luvulewa 'wainega, siwe tutuya de'e 'asa'aiana. Nuanuaku 'wa na nuatavuni nuana 'wa na 'ive'atumaia i na nunago yana nuavita i na vebwaika-'afo'afo i na 'ivedumwe'ai'aia. Begaidi a na vonemi nuanuaku yami sauluva wata yami vona 'waidiega 'wa na ve bega i na 'asetai 'wa nuakalikalieni. Basenadi leta a kiluma i wai 'waimie 'ana vematavuloga faifaina, a silubumi a da 'asetai yaku vona 'wa vevematayakeyakedi nani matatabuna 'waidie 'alo kebu. 10 'Ai'edi aitoi 'wa nuatavuniga, yau wata bani'odi 'akonadi a nuatavuni. We'e yaku nuatavunanina, 'ai'edi mogitana tamu sakona i 'eno'eno a nuatavuniga, a nuatavuni Keliso mataneye yami 'atumaina faifaina nika 'wa na sosoana. 11 Fai Seitani yana nuanua sakoidi ta 'asetadi, tosakona 'akonadi i nuavilaiga ta na nuakalikalieni, i na nunago Seitani i na vetoketoke 'waideye nika 'ida tovetumagana yada mia i na 'ivesakoi.

  • S5 1 Kol 5:1S11 Luk 22:31-32

Yaubada yana tofolovavo i kiavetoketokedi.

12 Basenadi yaku lauvivila 'waineye a nago 'atamana Tiloasi a na lau'age Keliso Valana 'Atumaina faifaina. Tutuyanina a le'wa a 'iseni 'akonadi 'Auvea tomotoganidi yadi nuanua i 'idewadi begaidi nuanuadi Valananina i na nogai. 13 We'e bei igodi iada Taito a da veluagai valami i da lu'ivona 'waikuye nika a 'isa'avai. Fai a 'isa'avai nuafouku i veviga begaidi a 'alanuai nika a tauya a nago 'awalawa Masidonia.

14 Bei Taito a veluagai valami i lu'ivona 'waikuye, 'ana nogaya 'atumaina begaidi a vekaiwa Yaubada 'waineye. A vekaiwaga Yaubada 'waineye fai i vetoketoke 'ana gaviavo 'waidie Keliso 'wainega, we'e 'ima yana tofolovavo tutuya matatabuna i 'e'edakumesema wata i kikiavetoketokema. Yaubada i venua'ivinema Keliso 'ana 'aseta faifaina 'a lalau'age tomotoga matatabuna 'waidie, 'wa da vo tamu magai 'ana yaoga 'iwanina i da susula tomotoga 'waidie. 15 Tomotoga 'ifwaidi i nunago 'ita'ita'i 'ana 'eda 'waineamo, we'e 'ifwaidi i nunago wafaotoga 'ana 'eda 'waineamo. Keliso faifaina 'a lalau'age tomotoganidi matadie, bani'odi Keliso magaina i sousouyeni 'waimega, Yaubada yana 'eba sosoana. 16 Tomotoganidi i nunago wafaotoga 'ana 'eda 'waineamo Keliso 'ana lau'age 'waidie bani'odi taumata 'anibaina magaina, we'e tomotoganidi 'ita'ita'i i veveluagai, 'ana lau'age 'waidie bani'odi magai 'iwanina, yadi 'eba 'isa 'awaie mia 'atumaina wata miamia-vagaina i na veluagai. Folovanina vetolau'age, 'wa da nuani egavo 'adi fata i na folovi? 17 Tomotoga fuedi Yaubada yana Vona i lalau'agega yadi nuanua i vo, Nani-'avo'avovo siwe 'a na lalau'age mani bwaikina 'a na veluagai.” We'e 'ima, kebu bani'odi 'a da vesauluvediga. Fai Yaubada i venua'ivinema 'a vetofolova Keliso faifaina, kebu faifaima 'a da nuanua, Yaubada mataneye yana Vona 'a veveifufu tonovina. Begaidi folovanina vetolau'age faifaina, 'ima 'ama fata.

  • S12-13 Fol 14:27S14 Lom 6:17S15 1 Kol 1:18S17 1 Fit 4:11
Copyright information for `YML