1Th 2 | FreGeneve1669 | STEP | CAR , freres , vous-meſmes ſçavez que noſtre entrée vers vous n’a point eſté vaine :

‏ 1 Thessalonians 2

1 CAR , freres , vous-meſmes ſçavez que noſtre entrée vers vous n’a point eſté vaine : 2 Mais encore qu’auparavant nous euſſions eſté affligez & outragez à Philippes , comme vous ſçavez , nous avons pris hardieſſe en noſtre Dieu de vous annoncer l’Evangile de Dieu avec un grand combat. 3 Car noſtre exhortation n’a point eſté par abuſion , ni par vilenie , ni en fraude. 4 Mais comme nous avons eſté approuvez de Dieu , à ce que la predication de l’Evangile nous fuſt commiſe , ainſi parlons-nous , non point comme voulant complaire aux hommes , mais à Dieu qui eſprouve nos cœurs. 5 Car auſſi nous ne nous ſommes jamais trouvez en parole de flatterie , ainſi que vous le ſçavez , ni en pretexte d’avarice : Dieu en est teſmoin. 6 Et nous n’avons point cherché la gloire des hommes , ni de par vous , ni par autres : encore que nous euſſions pû montrer de l’authorité comme apoſtres de Chriſt : 7 Mais nous avons eſté doux au milieu de vous , comme ſi une nourrice nourriſſoit tendrement ſes enfans. 8 Eſtant donc ainſi affectionnez envers vous , nous ſouhaittions de vous élargir , non ſeulement l’Evangile de Dieu , mais auſſi nos propres ames , parce que vous eſtiez bien-aimez de nous. 9 Car , freres , vous vous ſouvenez de noſtre labeur & travail : veu que nous vous avons preſché l’Evangile de Dieu , travaillans nuit & jour , afin de ne charger aucun de vous. 10 Vous eſtes teſmoins , & Dieu auſſi , comme nous nous ſommes portez ſainctement & juſtement , & ſans reproche envers vous qui croyez : 11 Ainſi que vous ſçavez que nous avons exhorté chacun de vous : (comme un pere ſes enfans :) 12 Et conſolé , & adjuré que vous cheminaſſiez dignement , comme il eſt ſeant ſelon Dieu , qui vous appelle à ſon royaume & à ſa gloire. 13 Pour cette cauſe auſſi , nous rendons graces à Dieu ſans ceſſe , de ce que quand vous avez receu de nous la parole de la predication de Dieu , vous l’avez receuë non point comme parole des hommes , mais (ainſi qu’elle eſt veritablement) comme parole de Dieu , laquelle auſſi agit avec efficace en vous qui croyez. 14 Car , freres , vous eſtes faits imitateurs des egliſes de Dieu qui ſont en Judée en Jeſus Chriſt , parce que vous avez auſſi ſouffert les meſmes choſes de par ceux de voſtre propre nation , comme auſſi eux par les Juifs : 15 Leſquels ont meſme mis à mort le Seigneur Jeſus , & leurs propres Prophetes , & nous ont déchaſſez & ne plaiſent point à Dieu , & ſont adverſaires à tous hommes : 16 Nous empeſchans de parler aux Gentils à ce qu’ils ſoyent ſauvez , afin qu’ils comblent toûjours leurs pechez : car l’ire eſt parvenuë ſur eux juſques au bout. 17 Or , freres , entant que nous avons eſté privez de vous pour un moment de temps , de veuë , non point de cœur , nous nous ſommes employez avec un grand deſir de voir voſtre face. 18 C’eſt pourquoi nous avons voulu venir vers vous (au moins moi Paul) une fois , voire deux : mais Satan nous y a mis de l’empeſchement. 19 Car quelle eſt noſtre eſperance , ou joye , ou couronne de gloire ? n’eſt-ce pas vous auſſi devant noſtre Seigneur Jeſus Chriſt à ſa venuë ? 20 Certes vous eſtes noſtre gloire & noſtre joye.