1Th 3 | FreGeneve1669 | STEP | C’EST pourquoi ne pouvant plus endurer , il nous ſembla bon d’eſtre laiſſez ſeuls à Athenes.

‏ 1 Thessalonians 3

1 C’EST pourquoi ne pouvant plus endurer , il nous ſembla bon d’eſtre laiſſez ſeuls à Athenes. 2 Et nous envoyames Timothée noſtre frere , & miniſtre de Dieu , & noſtre compagnon d’œuvre en l’Evangile de Chriſt , pour vous affermir , & pour vous exhorter touchant voſtre foi : 3 Afin que nul ne ſoit troublé en ces afflictions , car vous ſçavez vous meſmes que nous ſommes ordonnez à cela. 4 Car quand nous eſtions avec vous , nous vous prediſions que nous aurions à ſouffrir des afflictions : comme auſſi il eſt advenu , & vous le ſçavez. 5 Et partant auſſi ne pouvant plus endurer , je l’envoyai pour connoiſtre de l’eſtat de voſtre foi : de peur que celui qui tente , ne vous euſt tentez en quelque ſorte , & que noſtre labeur ne fuſt tourné à neant. 6 Or Timothée eſtant revenu depuis peu vers nous de devers vous , & nous ayant apporté de joyeuſes nouvelles touchant voſtre foi & voſtre charité , & comme vous avez toûjours bonne ſouvenance de nous , deſirant grandement de nous voir , comme nous auſſi vous : 7 Pour cette cauſe , freres , nous avons eſté conſolez en vous , en toute noſtre affliction & neceſſité , par voſtre foi. 8 Car maintenant nous vivons , ſi vous tenez fermes au Seigneur. 9 Car quelle action de graces pouvons nous rendre à Dieu touchant vous , pour toute la joye de laquelle nous nous éjouïſſons à cauſe de vous devant noſtre Dieu ? 10 Priant jour & nuit de plus en plus de revoir voſtre face , afin de ſuppléer à ce qui defaut à voſtre foi. 11 Or noſtre Dieu & Pere , & noſtre Seigneur Jeſus , veuille addreſſer noſtre chemin vers vous. 12 Et le Seigneur vous accroiſſe , & vous faſſe abonder tant & plus en charité les uns envers les autres , & envers tous , comme nous auſſi abondons envers vous : 13 Pour affermir vos cœurs ſans reproche en ſainteté , devant Dieu qui eſt noſtre Pere , à la venuë de noſtre Seigneur Jeſus Chriſt , avec tous ſes Saints.