1Th 1 | FreGeneve1669 | STEP | PAUL & Silvain , & Timothée , à l’Egliſe des Theſſaloniciens , qui est en Dieu le Pere , & au Seigneur Jeſus Chriſt : Grace vous ſoit & paix , de par Dieu noſtre Pere , & de par le Seigneur Jeſus Chriſt.

‏ 1 Thessalonians 1

1 PAUL & Silvain , & Timothée , à l’Egliſe des Theſſaloniciens , qui est en Dieu le Pere , & au Seigneur Jeſus Chriſt : Grace vous ſoit & paix , de par Dieu noſtre Pere , & de par le Seigneur Jeſus Chriſt. 2 Nous rendons toûjours graces à Dieu de vous tous , faiſons mention de vous en nos prieres : 3 Nous ramentevans ſans ceſſe l’œuvre de voſtre foi , & le travail de voſtre charité , & la patience de voſtre eſperance que vous avés en noſtre Seigneur Jeſus Chriſt devant noſtre Dieu & Pere : 4 Sçachans , freres bien-aimez de Dieu , voſtre élection. 5 Car noſtre predication de l’Evangile n’a point eſté en voſtre endroit , ſeulement en parole , mais auſſi en vertu , & en Saint Eſprit , & en grande certitude , ainſi que vous ſçavez quels nous avons eſté entre vous pour l’amour de vous. 6 Auſſi avez-vous eſté imitateurs de nous , & du Seigneur : ayans receu avec joye du Saint Eſprit la Parole accompagnée de grande affliction : 7 Tellement que vous avez eſté pour patron à tous les croyans en la Macedone & en l’Achaïe. 8 Car la parole du Seigneur a retenti de par vous , non ſeulement en la Macedone & en l’Achaïe , mais auſſi en tous lieux : & voſtre foi envers Dieu eſt divulguée , tellement qu’il ne nous eſt pas beſoin d’en rien dire : 9 Car eux-meſmes racontent de nous , quelle entrée nous avons euë vers vous , & comment vous avez eſté convertis des idoles à Dieu , pour ſervir le Dieu vivant & vrai : 10 Et pour attendre des cieux ſon Fils Jeſus , qu’il a reſſuſcité des mors , lequel nous delivre de l’ire à venir.