2Cor 1 | FreGeneve1669 | STEP | PAUL apoſtre de Jeſus Chriſt par la volonté de Dieu , & le frere Timothée , à l’Egliſe de Dieu qui eſt à Corinthe , avec tous les Saints qui ſont en toute l’Achaïe :

‏ 2 Corinthians 1

1 PAUL apoſtre de Jeſus Chriſt par la volonté de Dieu , & le frere Timothée , à l’Egliſe de Dieu qui eſt à Corinthe , avec tous les Saints qui ſont en toute l’Achaïe : 2 Grace vous ſoit & paix de par Dieu noſtre Pere , & de par le Seigneur Jeſus Chriſt. 3 Benit ſoit Dieu qui eſt le Pere de noſtre Seigneur Jeſus Chriſt , le Pere des miſericordes , & le Dieu de toute conſolation : 4 Qui nous conſole en toute noſtre affliction , afin que par la conſolation de laquelle nous-meſmes ſommes conſolez de Dieu , nous puiſſions conſoler ceux qui ſont en quelque affliction que ce ſoit. 5 Car comme les ſouffrances de Chriſt abondant en nous , pareillement auſſi noſtre conſolation abonde par Chriſt. 6 Et ſoit que nous ſoyons affligez , c’eſt pour voſtre conſolation & ſalut , qui ſe produit en endurant les meſmes ſouffrances que nous ſouffrons auſſi : ſoit que nous ſoyons conſolez , c’eſt pour voſtre conſolation & ſalut. 7 Et l’eſperance que nous avons de vous est ferme , ſçachans que comme vous eſtes participans des ſouffrances , pareillement auſſi le ſerez-vous de la conſolation. 8 Car freres , nous ne voulons point que vous ignoriés quant à noſtre affliction qui nous eſt advenuë en Aſie , que nous avons eſté exceſſivement ſurchargés par deſſus nostre force : tellement que nous en avons eſté en extréme perplexité , meſme de la vie. 9 Meſme nous avions dejà en nous-meſmes la ſentence de mort : confiance en nous-meſmes , mais en Dieu qui reſſuſcite les morts : 10 Lequel nous a délivrez d’une ſi grande mort , & nous delivre : auquel nous eſperons qu’encore ci-apres il nous delivrera : 11 Moyennant auſſi voſtre aide par la priere que vous ferez pour nous , afin que par pluſieurs , graces ſoyent renduës pour nous , pour le don qui nous aura fait , pour l’eſgard de pluſieurs perſonnes. 12 Car c’eſt là noſtre gloire , aſſavoir le teſmoignage de noſtre conſcience , qu’en ſimplicité & ſincerité de Dieu , & non point en ſapience charnelle , mais ſelon la grace de Dieu , nous avons converſé au monde , & ſingulierement envers vous. 13 Car nous ne vous eſcrivons point d’autres choſes que celles que vous ſçavez , ou meſmes connoiſſez : & j’eſpere que vous les reconnoiſtrez juſques au bout. 14 Comme auſſi vous nous avez reconnus en partie , que nous ſommes voſtre gloire , comme vous estes auſſi la noſtre pour le jour du Seigneur Jeſus. 15 Et en cette confiance je voulois premierement venir vers vous , afin que vous euſſiez une ſeconde grace : 16 Et puis paſſer par devers vous en Macedone : puis derechef de Macedone venir vers vous , & eſtre conduit par vous en Judée. 17 Quand donc je propoſois cela , ai-je uſé de legereté ? Selon la chair , tellement qu’en mon endroit il y ait , Oui , oui : & puis , Non , non ? 18 Or Dieu eſt fidele , que noſtre parole de laquelle j’ai uſé envers vous , n’a point eſté , Oui , & Non. 19 Car Jeſus Chriſt le Fils de Dieu , qui par nous a eſté preſché entre vous , aſſavoir par moi , & par Silvain , & par Timothée , n’a point eſté , Oui , & Non : mais a eſté , Oui en lui. 20 Car autant qu’il y a de promeſſes de Dieu , elles ſont, Oui en lui , & Amen en lui , à la gloire de Dieu par nous. 21 Or celui qui nous confirme avec vous en Chriſt , & qui nous a oinct , c’est Dieu ; 22 Lequel auſſi nous a ſeelez , & nous a donné les arrhes de l’Eſprit en nos cœurs. 23 Or j’appelle Dieu à teſmoin ſur mon ame , que ç’a eſté pour vous eſpargner que je ne ſuis point encore venu à Corinthe. 24 Non point que nous ayons domination ſur voſtre foi , mais nous aidons à voſtre joye : car c’eſt par la foi que vous eſtes debout.