2Pe 1 | FreGeneve1669 | STEP | SIMEON Pierre ; ſerviteur & apoſtre de Jeſus Chriſt , à vous qui avez obtenu une foi de pareil prix avec nous , par la juſtice de noſtre Dieu , & Sauveur Jeſus Chriſt :

‏ 2 Peter 1

1 SIMEON Pierre ; ſerviteur & apoſtre de Jeſus Chriſt , à vous qui avez obtenu une foi de pareil prix avec nous , par la juſtice de noſtre Dieu , & Sauveur Jeſus Chriſt : 2 Grace & paix vous ſoit multipliée en la connoiſſance de Dieu & de noſtre Seigneur Jeſus : 3 Puis que ſa divine puiſſance nous a donné tout ce qui appartient à la vie & à la pieté , par la connoiſſance de celui nous a appellez par ſa propre gloire & vertu. 4 Par leſquelles nous ſont données les grandes & precieuſes promeſſes , afin que par elles vous ſoyez faits participans de la nature divine , eſtant eſchappez de la corruption qui eſt au monde en convoitiſe. 5 Vous donc auſſi de meſme y apportant toute diligence , ajouſtez vertu par deſſus avec voſtre foi : & avec vertu ſcience : 6 Et avec ſcience , temperance : & avec temperance , patience : & avec patience , pieté : 7 Et avec pieté , amour fraternelle : & avec amour fraternelle , charité. 8 Car ſi ces choſes ſont en vous , & y abondent , elles ne vous laiſſeront point oiſeux , ni ſteriles en la connoiſſance de noſtre Seigneur Jeſus Chriſt. 9 Car celuy en qui ces choſes ne ſe trouvent point , eſt aveugle , & ne voit goutte de loin , ayant oublié la purification de ſes vieux pechez. 10 Partant , freres , eſtudiez-vous pluſtoſt à affermir voſtre vocation & election : car en ce faiſant vous ne chopperez jamais. 11 Car par ce moyen l’entrée au royaume eternel de noſtre Seigneur & Sauveur Jeſus Chriſt vous ſera abondamment fournie. 12 C’eſt pourquoi je ne ſera point pareſſeux à vous ramentevoir toûjours ces choſes , encore que vous ſoyez connoiſſans & fondez en la verité preſente. 13 Car j’eſtime que c’eſt une choſe juſte , tandis que je ſuis en ce tabernacle , de vous éveiller par avertiſſement : 14 Sçachant qu’en bref j’ai à déloger de ce mien tabernacle , comme noſtre Seigneur Jeſus Chriſt meſme me l’a declaré. 15 Mais je mettrai peine qu’apres mon depart auſſi vous puiſſiez continuellement vous ramentevoir ces choſes. 16 Car nous ne vous avons point donné à connoitre la puiſſance & la venuë de noſtre Seigneur Jeſus Chriſt , en enſuivant des fables artificiellement compoſées : mais comme ayant veu ſa Majeſté de nos propres yeux. 17 Car il avoit receu de Dieu le Pere honneur & gloire , quand une telle voix lui fut envoyée de la gloire magnifique , Celui-ci eſt mon Fils bien-aimé , auquel j’ai pris mon bon plaiſir. 18 Et nous oüiſmes cette voix envoyée du ciel , eſtant avec luy ſur ſa ſainte montagne. 19 Nous avons auſſi la parole des Prophetes tres-ferme , à laquelle vous faites bien d’entendre , comme à une chandelle qui éclaire en un lieu obſcur , juſques à ce que le jour commence à luire & que l’eſtoile du matin ſe leve en vos cœurs : 20 Si vous entendez premierement cela , que nulle prophetie de l’Eſcriture n’eſt de particuliere declaration. 21 Car la prophetie n’a point eſté jadis apportée par la volonté humaine : mais les ſaints hommes de Dieu eſtant pouſſez du Saint Eſprit ont parlé.