2Th 1 | FreGeneve1669 | STEP | PAUL & Silvain , & Timothée , à l’Egliſe des Theſſaloniciens , qui eſt en Dieu noſtre Pere & au Seigneur Jeſus Chriſt :

‏ 2 Thessalonians 1

1 PAUL & Silvain , & Timothée , à l’Egliſe des Theſſaloniciens , qui eſt en Dieu noſtre Pere & au Seigneur Jeſus Chriſt : 2 Grace vous ſoit, & paix de par Dieu noſtre Pere , & de par le Seigneur Jeſus Chriſt. 3 Freres , nous devons toûjours rendre graces à Dieu de vous , comme c’eſt bien raiſon , dautant que voſtre foi croiſt grandement , & que la charité de chacun de vous abonde de l’un envers l’autre. 4 Tellement que meſmes nous nous glorifions de vous és egliſes de Dieu , à cauſe de voſtre patience & de voſtre foi en toutes vos perſecutions & afflictions que vous ſouſtenez : 5 Leſquelles ſont une manifeſte demonſtration du juſte jugement de Dieu : à ce que vous ſoyez repurez dignes du royaume de Dieu : pour lequel auſſi vous ſouffrez. 6 Veu que c’eſt une choſe juſte envers Dieu , qu’il rende affliction à ceux qui vous affligent : 7 Et à vous qui eſtes affligez , relaſche avec nous , lors que le Seigneur Jeſus ſera revelé du ciel avec les Anges de ſa puiſſance , 8 Avec flamme de feu , exercant vengeance contre ceux qui ne connoiſſent point Dieu , & qui n’obeïſſent point à l’Evangile de noſtre Seigneur Jeſus Chriſt. 9 Leſquels ſeront punis de perdition eternelle , de par la face du Seigneur , & de par la gloire de ſa force. 10 Quand il viendra pour eſtre glorifié en ſes Saints , & eſtre rendu admirable en tous les croyans (parce que noſtre témoignage envers vous a eſté creu) en ce jour-là. 11 Pour laquelle cauſe auſſi nous prions toûjours pour vous , que noſtre Dieu vous rende dignes de ſa vocation , & accompliſſe en vous tout le bon plaiſir de ſa bonté , & l’œuvre de la foi puiſſamment : 12 Afin que le Nom de noſtre Seigneur Jeſus Chriſt ſoit glorifié en vous , & vous en lui , ſelon la grace de noſtre Dieu , & du Seigneur Jeſus Chriſt.