2Th 2 | FreGeneve1669 | STEP | OR , freres , nous vous prions par l’advenement de noſtre Seigneur Jeſus Chriſt , & par noſtre recueil en lui.

‏ 2 Thessalonians 2

1 OR , freres , nous vous prions par l’advenement de noſtre Seigneur Jeſus Chriſt , & par noſtre recueil en lui. 2 Que vous ne ſoyez point toſt esbranlez d’entendement , ni troublez par eſprit , ni par parole , ni par epiſtre , comme de par nous , comme ſi la journée de Chriſt eſtoit prochaine. 3 Que nul ne vous ſeduiſe en quelque ſorte que ce ſoit : car ce jour-là ne viendra point que premierement ne ſoit advenuë la revolte , & que l’homme de peché ne ſoit revelé , le fils de perdition : 4 Qui s’oppoſe & s’éleve contre tout ce qui eſt nommé Dieu , ou qu’on adore , juſques à eſtre aſſis comme Dieu au temple de Dieu , ſe portant comme s’il eſtoit Dieu. 5 Ne vous ſouvient-il point que quand j’eſtois encore avec vous , je vous diſois ces choſes ? 6 Et maintenant vous ſçavez ce qui le retient , afin qu’il ſoit revelé en ſon temps. 7 Car déja le myſtere d’iniquité ſe met en train : ſeulement celui qui obtient maintenant , obtiendra juſques à ce qu’il ſoit aboli. 8 Et alors le meſchant ſera revelé , lequel le Seigneur deconfira par l’Eſprit de ſa bouche , & abolira par la clarté de ſon advenement : 9 Duquel meſchant l’advenement eſt ſelon l’efficace de Satan : en toute puiſſance , & ſignes , & miracles de menſonge : 10 Et en toute ſeduction d’iniquité , en ceux qui periſſent : dautant qu’ils n’ont point receu la dilection de verité , pour eſtre ſauvez : 11 Et partant Dieu leur envoyera efficace d’erreur pour croire au menſonge : 12 Afin que tous ceux-là ſoyent jugez qui n’ont point creu à la verité , mais ont pris plaiſir à l’iniquité. 13 Mais , ô freres bien aimez du Seigneur , nous devons toûjours rendre graces à Dieu quant à vous , de ce que Dieu vous a éleus dés le commencement à ſalut , en ſanctification d’Eſprit , & par la foi de verité. 14 A quoi il vous a appellez par noſtre Evangile , à l’acquiſition de la gloire de noſtre Seigneur Jeſus Chriſt. 15 C’eſt pourquoi , freres , demeurez fermes , & retenez les enſeignemens que vous avez appris , ſoit par noſtre parole , ou par noſtre Epiſtre. 16 Or lui-meſme Jeſus Chriſt , noſtre Seigneur , & noſtre Dieu & Pere qui nous a aimez & nous a donné conſolation eternelle , & bonne eſperance en grace , 17 Veuille conſoler vos cœurs , & vous affermir en toute bonne parole & bonne œuvre.