Act 12 | FreGeneve1669 | STEP | Et en ce meſme temps-là le roi Herode ſe mit à mal-mener quelques-uns de ceux de l’Egliſe.

‏ Acts 12

1 Et en ce meſme temps-là le roi Herode ſe mit à mal-mener quelques-uns de ceux de l’Egliſe. 2 Et mit à mort par l’eſpée Jaques frere de Jean. 3 Et voyant que cela eſtoit agreable aux Juifs , il fit encore davantage , & s’avança d’empoigner auſſi Pierre. 4 Or c’eſtoit és jours des pains ſans levain. Et quand il l’eut empoigné , il le mit en priſon & le bailla à garder à quatre quatraines de ſoldats : le voulant produire au ſupplice devant le peuple apres la feſte de Paſque. 5 Ainſi Pierre eſtoit gardé en la priſon : mais l’Egliſe faiſoit ſans ceſſe des prieres à Dieu pour lui. 6 Et comme Herode le devoit produire au ſupplice , Pierre dormoit cette nuit-là entre deux ſoldats , lié de deux chaines , & les gardes devant la porte gardoyent la priſon. 7 Et voici , un Ange du Seigneur ſurvint , & une lumiere reſplendit en la priſon : & frappant le coſté de Pierre , il l’eſveilla , diſant , Leve-toi legerement. Et les chaines tomberent de ſes mains. 8 Alors l’Ange lui dit , Cein-toi , & chauſſe tes ſouliers. Ce qu’il fit. Puis il lui dit , Jette ta robbe ſur toi & me ſui. 9 Lui donc ſortant , le ſuivit , & il ne ſçavoit point que ce qui ſe faiſoit par l’Ange fuſt vrai : mais il penſoit voir quelque viſion. 10 Et quand ils eurent paſſé la premiere & la ſeconde garde , ils vinrent à la porte de fer , qui ſe rend en la ville , laquelle s’ouvrit à eux d’elle-meſme; & eſtans ſortis ils paſſerent une ruë & incontinent l’Ange ſe departit de lui. 11 Alors Pierre eſtant revenu à ſoi-meſme , dit , Je connois maintenant pour vrai que le Seigneur a envoyé ſon Ange , & m’a delivré de la main d’Herode , & de toute l’attente du peuple des Juifs. 12 Et ayant conſidéré le tout, il vint en la maiſon de Marie , mere de Jean ſurnommé Marc : où pluſieurs eſtoyent aſſemblez , & faiſans des prieres. 13 Et quand il eut heurté à la porte du porche , une fille nommée Rhode vint pour eſcouter : 14 Laquelle ayant connu la voix de Pierre , de joye n’ouvrit point le porche : mais s’encourut en la maiſon , & annonça que Pierre eſtoit devant le porche : 15 Et ils lui dirent , Tu es folle : Mais elle au contraire affirmoit qu’il eſtoit ainſi : & eux diſoyent , c’eſt ſon Ange. 16 Mais Pierre continuoit à heurter : & quand ils eurent ouvert , ils le virent , & furent comme ravis hors d’eux-meſmes. 17 Et lui leur ayant fait ſigne de la main qu’ils fiſſent ſilence , leur recita comment le Seigneur l’avoit mis hors de la priſon , & leur dit , Annoncez ces choſes à Jaques & aux freres. Puis ſortant de là , il s’en alla en un autre lieu. 18 Mais le jour eſtant venu , il y eut un grand trouble entre les ſoldats , pour ſçavoir ce que Pierre ſeroit devenu. 19 Et Herode l’ayant cherché , & ne le trouvant point , apres en avoir fait le procez aux gardes , commanda qu’ils fuſſent menez au ſupplice. Puis il deſcendit de Judée à Ceſarée , où il ſejourna. 20 Or il eſtoit en humeur de faire la guerre aux Tyriens & aux Sidoniens. Mais ils vinrent à lui tous d’un accord : & ayans gagné Blaſte qui eſtoit chambellan du Roi , ils demanderent la paix , parce que leur païs eſtoit nourri de celui du roi. 21 Et en un certain jour ordonné , Herode reveſtu d’une robbe royale , s’aſſit au ſiege judicial , & les haranguoit. 22 Dont le peuple s’eſcria , Voix de Dieu , & non point d’homme. 23 Et à l’inſtant un Ange du Seigneur le frappa , parce qu’il n’avoit point donné gloire à Dieu : il fut rongé de vermine , & rendit l’eſprit. 24 Mais la parole du Seigneur croiſſoit & ſe multiplioit. 25 Barnabas auſſi & Saul , apres avoir accompli leur charge , retournerent de Jeruſalem , ayans auſſi pris avec eux Jean , qui eſtoit ſurnommé Marc.