Mat 1 | FreGeneve1669 | STEP | Livre de la generation de Jeſus Chriſt , fils de David , fils d’Abraham.

‏ Matthew 1

1 Livre de la generation de Jeſus Chriſt , fils de David , fils d’Abraham. 2 Abraham engendra Iſaac. Et Iſaac engendra Jacob. Et Jacob engendra Juda & ſes freres. 3 Et Juda engendra Pharez & Zara de Thamar. Et Pharez engendra Eſrom. Et Eſrom engendra Aram. 4 Et Aram engendra Aminadab. Et Aminadab engendra Naaſſon. Et Naaſſon engendra Salmon. 5 Salmon engendra Boos de Rachab. Et Boos engendra Obed de Ruth. Et Obed engendra Jeſſé. 6 Et Jeſſé engendra le Roi David. Et le Roi David engendra Salomon , de celle qui avoit eſté femme d’Urie. 7 Et Salomon engendra Roboam. Et Roboam engendra Abia. Et Abia engendra Aſa. 8 Et Aſa engendra Joſaphat. Et Joſaphat engendra Joram. Et Joram engendra Hozias. 9 Et Hozias engendra Joatham. Et Joatham engendra Achaz. Et Achaz engendra Ezechias. 10 Et Ezechias engendra Manaſſé. Et Manaſſé engendra Amon. Et Amon engendra Joſias 11 Et Joſias engendra Jakim. Et Jakim engendra Jechonias & ſes freres , ſur le temps qu’ils furent tranſportez en Babylone. 12 Et apres qu’ils eurent eſte tranſportez en Babylone , Jechonias engendra Salathiël. Et Salathiël engendra Zorobabel. 13 Et Zorobabel engendra Abiud. Et Abiud engendra Eliakim. Et Eliakim engendra Azor. 14 Et Azor engendra Sadoc. Et Sadoc engendra Achim. Et Achim engendra Eliud. 15 Et Eliud engendra Eleazar. Et Eleazar engendra Matthan. Et Matthan engendra Jacob. 16 Et Jacob engendra Joſeph , le mari de Marie , de laquelle eſt né Jeſus , qui eſt dit Chriſt. 17 Toutes les generations donc depuis Abraham juſques à David , font quatorze generations. Et depuis David juſques au temps qu’ils furent tranſportez en Babylone , quatorze generations. Et depuis qu’ils eurent eſté tranſportez en Babylone , juſques à Chriſt , quatorze generations. 18 Or la naiſſance de Jeſus Chriſt advint ainſi : Marie ſa mere eſtant fiancée à Joſeph , devant qu’ils fuſſent emſemble , elle ſe trouva enceinte du S.Eſprit. 19 Alors Joſeph ſon mari , d’autant qu’il eſtoit juſte , & qu’il ne la vouloit point diffamer , la voulut laiſſer ſecrettement. 20 Mais comme il penſoit à ces choſes , voivi , l’Ange du Seigneur lui apparut en ſonge , diſant , Joſeph fils de David , ne crain point de recevoir Marie ta femme : car ce qui eſt engendré en elle , eſt du S.Eſprit. 21 Et elle enfantera un fils , & tu appellera ſon nom JESUS : car il ſauvera ſon peuple de leurs pechez. 22 Or tout ceci eſt advenu , afin que fuſt accompli ce dont le Seigneur avoit parlé par le Prophete , diſant , 23 Voici , la vierge ſera enceinte , & enfantera un fils , & on appellera ſon nom Emmanuel , qui vaut autant à dire que DIEU-AVEC-NOUS. 24 Joſeph donc eſtant eſveillé de ſon dormir , fit ainſi que l’Ange du Seigneur lui avoit commandé , & receut ſa femme. 25 Et ne la connut point juſques à ce qu’elle euſt enfanté ſon premier né , & appella ſon nom Jeſus.