Rev 17 | FreGeneve1669 | STEP | ALORS l’un des ſept Anges qui avoyent les ſept phioles , vint , & parla à moi , me diſant , Vien , je te montrerai la condamnation de la grande paillarde , laquelle ſe ſied ſur pluſieurs eaux :

‏ Revelation of John 17

1 ALORS l’un des ſept Anges qui avoyent les ſept phioles , vint , & parla à moi , me diſant , Vien , je te montrerai la condamnation de la grande paillarde , laquelle ſe ſied ſur pluſieurs eaux : 2 Avec laquelle les rois de la terre ont paillardé , & du vin de la paillardiſe de laquelle ont eſté enyvrez les habitans de la terre. 3 Ainſi donc il me tranſporta en eſprit en un deſert : & je vis une femme montée ſur une beſte de couleur d’écarlatte , qui eſtoit pleine de noms de blaſpheme , ayant ſept teſtes & dix cornes. 4 Et la femme eſtoit accouſtrée de pourpre & d’écarlatte , & parée d’or , & de pierres precieuſes , & de perles : tenant en ſa main une coupe d’or , pleine d’abominations de la ſoüillure de ſa paillardiſe. 5 Et en ſon front il y avoit un nom eſcrit , Myſtere , la grande Babylone , la mere des paillardiſes & des abominations de la terre. 6 Et je vis la femme enyvrée du ſang des Saints , & du ſang des Martyrs de Jeſus : & la voyant je m’émerveillai d’un grand esbahiſſement. 7 Et l’Ange me dit , Pourquoi t’émerveilles-tu ? Je te dirai le myſtere de la femme , & de la beſte qui la porte , laquelle a ſept teſtes & dix cornes. 8 La beſte que tu as veüe , a eſté , & n’eſt plus : & doit monter de l’abyſme , & s’en aller à perdition : & les habitans de la terre , deſquels les noms ne ſont point eſcrits au livre de vie dés la fondation du monde , s’émerveilleront voyant la beſte laquelle eſtoit , & n’eſt plus , & toutefois elle eſt. 9 Ici eſt l’entendement qui a de la ſapience. Les ſept teſtes ſont ſept montagnes ſur leſquelles eſt aſſiſe la femme. 10 Et ce ſont ſept rois : les cinq ſont cheus : l’un eſt , & l’autre n’eſt point encore venu : & quand il ſera venu , il faut qu’il demeure pour un peu de temps. 11 Et la beſte qui eſtoit , & n’eſt plus , c’eſt auſſi le huictiéme roi, & eſt des ſept , & s’en va à perdition. 12 Et les dix cornes que tu as veües , ſont dix rois , qui n’ont point encore commencé à regner , mais ils prendront puiſſance comme rois , en un meſme temps avec la beſte. 13 Ceux-ci ont un meſme conſeil , & bailleront leur puiſſance & authorité à la beſte. 14 Ceux-ci combattront contre l’Agneau : mais l’Agneau les vaincra : dautant qu’il eſt le Seigneur des ſeigneurs , & le Roi des rois : & ceux qui ſont avec lui , ſont appellez , & éleus , & fideles. 15 Puis il me dit , Les eaux que tu as veües , ſur leſquelles eſt aſſiſe la paillarde , ce ſont peuples , & nations , & langues. 16 Et les dix cornes que tu as veües à la beſte , ſont ceux qui hairont la paillarde , & la rendront deſolée & nuë , & mangeront la chair , & la bruſleront au feu. 17 Car Dieu a mis en leurs cœurs qu’ils faſſent ce qu’il lui plaiſt , & qu’ils arreſtent une meſme choſe , & qu’ils donnent leur royaume à la beſte , juſques à ce que les paroles de Dieu ſoyent accomplies. 18 Et la femme que tu as veüe , c’eſt la grande Cité , qui a ſont regne ſur les rois de la terre.