Rev 18 | FreGeneve1669 | STEP | ET apres ces choſes je vis un autre Ange deſcendre du ciel , ayant une grande puiſſance , & la terre fut illuminée de ſa gloire :

‏ Revelation of John 18

1 ET apres ces choſes je vis un autre Ange deſcendre du ciel , ayant une grande puiſſance , & la terre fut illuminée de ſa gloire : 2 Et il s’écria de force à haute voix , diſant , Elle eſt cheute , elle eſt cheute , la grande Babylone , & eſt devenuë l’habitation des diables , & le repaire de tout eſprit immonde , & le repaire de tout oiſeau immonde & execrable. 3 Car toutes les nations ont beu du vin de l’ire de ſa paillardiſe : & les rois de la terre ont paillardé avec elle : & les marchands de la terre ſont devenus riches de l’abondance de ſes delices. 4 Puis j’oüis du ciel une autre voix diſant , Sortez d’elle , mon peuple , afin que vous ne ſoyez point participans de ſes pechez , & que vous ne receviez point de ſes playes. 5 Car ſes pechez ſe ſont entreſuivis juſques au ciel , & Dieu a eu ſouvenance des iniquitez d’icelle. 6 Rendez-lui ainſi qu’elle vous a fait , & lui payez au double ſelon ſes œuvres : en la coupe en laquelle elle vous a verſé , verſez-lui en au double. 7 D’autant qu’elle s’eſt glorifiée , & qu’elle a eſté en delices , d’autant donnez lui de tourment & de pleur : car elle dit en ſon cœur , Je ſieds reine , & ne ſuis point veuve , & ne verrai point de deüil. 8 C’eſt pourquoi en un ſeul jour viendront ſes playes , la mort , & le deüil , & la famine , & elle ſera entierement bruſlée au feu : car le Seigneur Dieu eſt fort , qui la jugera. 9 Et les rois de la terre , qui ont paillardé avec elle , & ont veſcu en delices , quand ils verront la fumée de ſon brûlement , la pleureront , & meneront deüil ſur elle , en ſe battant la poictrine : 10 Se tenant loin pour la crainte de ſon tourment , diſant , Las , las ! Babylone la grande cité , la cité ſi puiſſante , comment eſt-ce que ta condamnation eſt venuë en un inſtant ? 11 Les marchands de la terre pleureront auſſi , & meneront deüil à cauſe d’elle , de ce que nul n’achete plus de leur marchandiſe : 12 Marchandiſe d’or & d’argent , & de pierres precieuſes , & de perles , & de creſpe , & de pourpre , & de ſoye , & d’écarlatte , & de toute ſorte de bois odorant , & de tous vaiſſeaux d’yvoire , & de tous vaiſſeaux de bois tres-precieux , & d’airain , & de fer , & de marbre : 13 Et canelle , & ſenteurs , & oignemens , & encens , & vin , & huile , & fine fleur de farine , & blé , & jumens , & brebis , & chevaux , & chariots , & ſerfs , & ames d’hommes. 14 (Et les fruits du deſir de ton ame ſont departis de toi : & toutes choſes delicates & excellentes te ſont peries : & d’orenavant tu ne trouveras plus ces choſes.) 15 Les marchands donc de ces choſes qui en ſont devenus riches , ſe tiendront loin d’elle , pour la crainte de ſon tourment , pleurant & menant deüil. 16 Et diſant , Las , las ! La grande cité , qui eſtoit reveſtuë de creſpe , & de pourpre , & d’écarlatte , & eſtoit parée d’or , & ornée de pierres precieuſes & de perles : comment en un inſtant ont eſté miſes à neant tant de richeſſes ! 17 Tout patron de navire auſſi , & toute la troupe de ceux qui hantent és navires , & tous nautonniers , & quiconque trafique ſur la mer ſe tiendront loin : 18 Et voyant la fumée de ſon bruſlement , s’eſcrieront en diſant , Quelle cité eſtoit ſemblable à cette grande cité ? 19 Et jetteront de la poudre ſur leurs teſtes , & crieront en pleurant & menant deüil , & diſant , Las , las ! La grande cité , en laquelle tous ceux qui avoyent des navires en la mer , eſtoyent devenus riches de ſon opulence : comment a-t’elle eſté deſolée en un inſtant ! 20 O ciel ! Ejoüi-toi d’elle , & vous ſaints apoſtres & Prophetes : car Dieu a pris vengeance d’elle pour l’amour de vous. 21 Puis un fort Ange prit une pierre comme une grande meule , & la jetta en la mer , diſant , ainſi ſera jettée d’impetuoſité Babylone cette grande cité , & ne ſera plus trouvée. 22 Et la voix des joüeurs de harpe , & des muſiciens , & des joüeurs de haut-bois , & des ſonneurs de trompette , ne ſera plus oüie en toi : & tout ouvrier , de quelque meſtier que ce ſoit , ne ſera plus trouvé en moi : & le bruit de la meule ne ſera plus oüi en toi. 23 Et la lumiere de la chandelle ne luira plus en toi : & la voix de l’eſpoux & de l’eſpouſe ne ſera plus oüie en toi : parce que tes marchands eſtoyent des princes en la terre , parce que par tes empoiſonnemens toutes les nations ont eſté ſeduites. 24 Et en elle a eſté trouvé le ſang des Prophetes & des Saints , & de tous ceux qui ont eſté mis à mort ſur la terre.