Rev 19 | FreGeneve1669 | STEP | OR apres ces choſes j’oüis une voix d’une grande multitude au ciel , diſant , Hallelu-jah : Salut , & gloire , & honneur , & puiſſance appartient au Seigneur noſtre Dieu :

‏ Revelation of John 19

1 OR apres ces choſes j’oüis une voix d’une grande multitude au ciel , diſant , Hallelu-jah : Salut , & gloire , & honneur , & puiſſance appartient au Seigneur noſtre Dieu : 2 Car ſes jugemens ſont veritables & juſtes , parce qu’il a fait juſtice de la grande paillarde qui a corrompu la terre par ſa paillardiſe , & a vengé le ſang de ſes ſerviteurs de la main d’icelle. 3 Et derechef ils dirent , Hallelu-jah : & la fumée d’icelle en monte à jamais. 4 Et les vingt-quatre Anciens & les quatre animaux ſe jetterent ſur leurs faces ; & adorerent Dieu ſeant ſur le trône , diſans , Amen , Hallelu-jah. 5 Et une voix partit du trône , diſant , Loüez noſtre Dieu , tous ſes ſerviteurs , & vous qui le craignez , tant petits que grands. 6 Puis j’oüis comme une voix d’une grande aſſemblée , & comme le ſon de pluſieurs eaux , & comme la voix de forts tonnerres , diſant , Hallelu-jah : car le Seigneur noſtre Dieu Tout-puiſſant eſt entré en ſon regne. 7 Ejoüiſſons nous , & nous égayons , & lui donnons gloire : car les nopces de l’Agneau ſont venuës , & ſa femme s’eſt parée. 8 Et il lui a eſté donné d’eſtre veſtuë de creſpe pur & luiſant : car le creſpe ſont les juſtifications des Saints. 9 Alors il me dit , Eſcris , Bien-heureux ſont ceux qui ſont appellez au banquet des nopces de l’Agneau. Il me dit auſſi , Ces paroles de Dieu ſont veritables. 10 Alors je me jettai à ſes pieds pour l’adorer. Et il me dit , Garde-toi de le faire : je ſuis ton compagnon de ſervice , & de tes freres qui ont le témoignage de Jeſus. Adore Dieu : Car le témoignage de Jeſus eſt l’Eſprit de prophetie. 11 Puis je vis le ciel ouvert , & voici un cheval blanc , & celui qui eſtoit monté deſſus eſtoit appellé Fidele & Veritable , lequel juge & bataille juſtement. 12 Et ſes yeux eſtoyent comme une flamme de feu : & il y avoit ſur ſa teſte pluſieurs diademes , ayant un nom eſcrit que nul n’a connu ſinon lui-meſme. 13 Il eſtoit veſtu d’une robbe teinte en ſang , & ſon nom s’appelle , La Parole de Dieu. 14 Et les armées qui ſont au ciel le ſuivoyent ſur des chevaux blancs , veſtus de creſpe blanc & net. 15 Et de ſa bouche il ſortoit une eſpée trenchante , afin qu’il en frappe les nations : car il les gouvernera avec une verge de fer , & c’eſt lui qui foulera la cuve du vin du courroux & de l’ire de Dieu Tout-puiſſant. 16 Et en ſon veſtement & en ſa cuiſſe il avoit en eſcrit ce nom , Le Roi des rois , et le Seigneur des seigneurs. 17 Puis je vis un Ange ſe tenant dans le ſoleil , qui cria à haute voix , diſant à tous les oiſeaux qui voloyent par le milieu du ciel , Venez & vous aſſemblez au banquet du grand Dieu : 18 Afin que vous mangiez la chair des rois , & la chair des capitaines , & la chair des forts , & la chair des chevaux & de ceux qui ſont montez deſſus , & la chair de tous , francs & ſerfs , petits & grands. 19 Alors je vis la beſte , & les rois de la terre , & leurs armées aſſemblées pour faire la guerre contre celui qui eſtoit monté ſur le cheval , & contre ſon armée. 20 Mais la beſte fut priſe , & avec elle le faux prophete qui avoit fait les ſignes devant elle , par leſquels il avoit ſeduit ceux qui avoyent la marque de la beſte , & qui avoyent adoré ſon image : ces deux furent jettez tout vifs dans l’eſtang de feu ardent de ſouphre. 21 Et le reſte fut tué par l’eſpée qui ſortoit de la bouche de celui qui eſtoit monté ſur le cheval , & tous les oiſeaux furent ſoulez de leurs chairs.