Rom 16 | FreGeneve1669 | STEP | JE vous recommande noſtre ſœur Phebe , laquelle eſt Diaconiſſe de l’Egliſe de Cenchrée.

‏ Romans 16

1 JE vous recommande noſtre ſœur Phebe , laquelle eſt Diaconiſſe de l’Egliſe de Cenchrée. 2 Afin que vous la recueilliez au Seigneur , comme il appartient aux Saints , & que vous l’aſſiſtiez en toute choſe qu’elle aura beſoin de vous : car elle a eſté hoſteſſe de pluſieurs , voire de moi-meſme. 3 Salüez Priſcille & Aquile , mes compagnons d’œuvre en Jeſus-Chriſt : 4 Qui ont ſouſmis leur col pour ma vie : auſquels je ne rens point grace moi ſeul , mais auſſi toutes les egliſes des Gentils. 5 Salüez auſſi l’Egliſe qui eſt en leur maiſon. Salüez Epainete mon bien-aimé , qui eſt les premices d’Achaïe en Chriſt. 6 Salüez Marie , laquelle a fort travaillé envers nous. 7 Salüez Andronique & Junias mes couſins , & qui ont eſté priſonniers avec moi , leſquels ſont notables entre les apoſtres , & qui ont meſmes eſté devant moi en Chriſt. 8 Salüez Amplias mon bien-aimé au Seigneur. 9 Salüez Urbain noſtre compagnon d’œuvre en Chriſt , & Stachys mon bien-aimé. 10 Salüez Appelles approuvé en Chriſt. Salüez ceux de chez Ariſtobule. 11 Salüez Herodion mon couſin. Salüez ceux de chez Narciſſe , qui ſont en noſtre Seigneur. 12 Salüez Tryphene & Thryphoſe , leſquelles travaillent en noſtre Seigneur. Salüez Perſide la bien-aimée , laquelle a beaucoup travaillé en noſtre Seigneur. 13 Salüez Rufus eſleu au Seigneur , ſa mere & la mienne. 14 Salüez Aſyncrite , Phlegon , Hermas , Patrobas , Hermes , & les freres qui ſont avec eux. 15 Salüez Philologue , & julie , Nerée , & ſa ſœur , & Olympe , & tous les Saints qui ſont avec eux. 16 Salüez-vous l’un l’autre par un ſaint baiſer. Les egliſes de Chriſt vous ſalüent. 17 Or je vous exhorte , freres , que vous preniez garde à ceux qui font des partialitez & des ſcandales contre la doctrine que vous avez appriſe , & que vous vous deſtourniez d’eux. 18 Car ceux qui font tels , ne ſervent point noſtre Seigneur Jeſus Chriſt , mais leur propre ventre : & par de douces paroles & des flatteries ſeduiſent les cœurs des ſimples. 19 Car voſtre obeïſſance eſt parvenuë à la connoiſſance de tous. Je m’éjouïs donc de vous ; mais je deſire que vous ſoyez ſages quant au bien , & ſimples quant au mal. 20 Or le Dieu de paix briſera en bref Satan ſous vos pieds. La grace de noſtre Seigneur Jeſus-Chriſt ſoit avec vous. Amen. 21 Timothée mon compagnon d’œuvre vous ſaluë , & Lucius , & Jaſon , & Soſipater , mes couſins. 22 (Moi Tertius qui ai eſté l’eſcrivain de cette Epiſtre , vous ſaluë en noſtre Seigneur.) 23 Gaius mon hoſte , & de toute l’Egliſe , vous ſaluë : Eraſte le procureur de la ville vous ſaluë , & Quartus noſtre frere. 24 La grace de noſtre Seigneur Jeſus Chriſt ſoit avec vous tous. Amen. 25 Or à celui qui eſt puiſſant pour vous affermir ſelon mon Evangile , & ſelon la predication de Jeſus-Chriſt , ſuivant la revelation du myſtere qui a eſté teu dés le temps jadis ; 26 Mais qui eſt maintenant manifeſté & donné à connoitre par les Eſcritures des Prophetes , ſuivant le commandement du Dieu Eternel , afin qu’il y ait obeïſſance de foi parmi toutes les nations ; 27 A Dieu ſeul ſage ſoit gloire à tout jamais , par Jeſus-Chriſt. Amen.