1Ti 1 | LezIBTNT | STEP | Чи Хиласкар тир Аллагьдин ва чи умуд тир Иса Месигьдин эмирдалди Месигь Исадин илчи хьанвай Павелан патай

‏ 1 Timothy 1

Саламар

1 Чи Хиласкар тир Аллагьдин ва чи умуд тир Иса Месигьдин эмирдалди Месигь Исадин илчи хьанвай Павелан патай 2 иманда зи гьакъикъи хва тир ТӀиматӀеяз.

Аллагь Бубадин патай ва чи Ребби Иса Месигьдин патай берекатар, регьим, саламатвал хьурай ваз.

Тапан тербетрикай виликамаз хабар гун

3 МакӀедандиз фидайла, за вавай кьетӀидаказ Эфесда амукьун ва бязи инсанриз маса са куькай ятӀани чирвилер тагурай, 4 акатай махаризни тухумрин а кьил авачир сиягьриз чпин вахт харж тавурай лугьун тӀалабнай. И карди анжах гьуьжетар арадал гъизва, имандал бине кьунвай Аллагьдин кар кьилиз акъатуниз куьмекзавач. 5 И тӀалабунин макьсад михьи рикӀяй, дугъри намусдай ва сидкьи галай имандай къвезвай муьгьуьббат я. 6 Амма бязи инсанар, и крар вири туна, кьуру рахунар ийиз ава. 7 Абуруз Къанундин муаллимар жез кӀанзава, амма чпи лугьузвай ва кьетӀидаказ тестикьарзавай гафарай чпин кьил акъатзавач.

8 Дуьздаказ гъиликиз хьайитӀа, Къанун хъсанди жедайди чаз чида. 9 Чаз гьакӀни чида хьи, Къанун гьахъ-михьибур патал ваъ, ам чӀурзавайбур патал, табий туширбур патал, асибур патал ва гунагькарар патал, са затӀни пак яз такьазвайбур патал ва чалкечирбур патал, чпин бубадин ва я дидедин уьмуьрдал гъил хкажзавайбур патал, ивикъичар ^{▼▼Ивикъич – инсан яна кьейи кас.} патал, 10 явавилиз кьил янавайбур патал, чпи чпиз гъуьл-пабвалзавай итимарни папар патал, инсанар чуьнуьхна лукӀвилиз маса гузвайбур патал, тапрукьар патал, тапан кьинер кьазвайбур патал ва дуьзгуьн тербетдиз аксивалзавайбур патал, 11 зал ихтибарнавай шукур Аллагьдин Шад Хабардихъ галаз кьан тийизвай вирибур патал я.

Павела вичиз Аллагьди авур регьимдай шукур авун

12 – 13 Заз къуватар гайи чи Ребби Иса Месигьдиз за шукур ийизва. Зун виликдай аси, зулумкар ва ягь авачир кас хьунизни килиг тавуна, Ада зун ихтибардиз лайих авайди яз гьисабна ва зи хиве пак везифа туна. Заз регьим авуна, вучиз лагьайтӀа за авур крар жуваз течиз ва имандал алачиз авунай. 14 Амма имандихъ ва Иса Месигьда авай муьгьуьббатдихъ галаз санал чи Реббидин вири девлет галай берекат зав агакьна.

15 И гаф гьакъикъи я ва кьабулуниз лайих я: Иса Месигь и дуьньядиз гунагькарар хиласун патал атанвайди я, абурукай виридалайни чӀуруди зун я. 16 Амма Реббиди заз регьим авуна. Зун, гунагькаррикай виридалайни чӀуруди яз, Иса Месигьдиз Аллагьдин сабур гьихьтин чӀехиди ятӀа, заз къалуриз кӀан хьана. И кар акуна, масадбурни эбеди уьмуьр къачун патал имандал атурай. 17 ГьакӀ тирвиляй къуй даиман Пачагьдиз, рекьин тийидай, таквадай ва сад Аллагьдиз даим яз аферин ва шукур хьурай! Амин.

18 – 19 ТӀиматӀей, чан хва, вакай лагьанвай кьван пайгъамбаррин гафар рикӀел алаз за ваз веси ийизва; заз вуна, абурал амал авуна, лайихдаказ женг чӀугуна, жуван иман ва михьи намус хвена кӀанзава. Садбуру ам гадарнава ва нетижада абурун имандин гими хасаратдик акатнава. 20 Абурун арада Гьуьменей ва Искендер ава, за абур асивал тийиз чир хьун патал иблисдин ихтиярда тунва.