1 Timothy 2
Дуьадикай ва ибадатдикай
1– 2Гьа икӀ, виридалайни вилик за тӀалабзава: чавай ислягьдаказ, секиндаказ муъминвал ийиз лайихдаказ уьмуьр тухун патал, Аллагьдиз вири инсанрин, пачагьрин ва гьукум гъиле авай вирибурун паталай аман-минет ва шукурар авуналди, дуьаяр ая. 3И кар чи Хиласкар тир Аллагьдиз хъсанни я, хушни. 4Адаз вири инсанар хилас хьана ва абуру гьакъикъат кьатӀана кӀанзава. 5«Аллагь сад я» a, Аллагьдинни инсанрин арада авайдини сад я – ам Инсан Иса Месигь я. 6Ада Вичи Вич вири инсанрин паталай эвекь яз гана, Ам дуьньядиз вичин вахтунда ганвай Аллагьдин шагьадатнама я. 7Гьавиляй зун чувудар туширбур патал гьакъикъи имандин чархачи яз, илчи яз ва муаллим яз тайинарнава, ва за авайвал лугьузва, табзавач. 8Гьавиляй итимри, хъелни гьуьжетар туна, гьар са чкадал пак гъилер хкажиз дуьа авуна кӀанзава заз. 9ГьакӀ папарини дамах гвачиз ва абу́р хвена, эдебдал амал авуна, алукӀрай; къуй абуру чеб кифер хруналди, къизилралди, гевгьерралди ва багьа парталралди ваъ, 10Аллагьдиз бахш хьанвай папари авуна кӀани хъсан краралди чӀагуррай ▼▼ЧӀагурун – иер авун.
. 11Къуй папари секиндиз, тамам табийвиле аваз чирвилер къачурай. 12Итимдиз тербетар ва я регьбервал гудай ихтияр за папаз гудач; ада сабур хуьн лазим я. 13ГьикӀ лагьайтӀа сифтедай халкь авурди Адам я, ахпа Гьава я, 14алцурар хьайидини Адам ваъ, паб я, тапунин чӀалахъ хьайиди ва хата авурди гьам я. 15Амма паб, аяларни хаз, иманда, муьгьуьббатда ва суваб галай паквиле хьайитӀа, хилас жеда.
Copyright information for
LezIBTNT