2Ti 4 | LezIBTNT | STEP | Аллагьдин ва чан алайбурунни кьейибурун гьахъ-дуван ийидай Иса Месигьдин вилик ва Ам Пачагьди хьиз агъавалун патал хкведайвиляй за вавай кьетӀидаказ тӀалабзава:

‏ 2 Timothy 4

Эхирдал кьван вафа хуьн

1 Аллагьдин ва чан алайбурунни кьейибурун гьахъ-дуван ийидай Иса Месигьдин вилик ва Ам Пачагьди хьиз агъавалун патал хкведайвиляй за вавай кьетӀидаказ тӀалабзава: 2 Шад Хабардикай муштулух це, къулай чӀавузни, къулай тушир чӀавузни кӀевиз акъваз, туькӀуьр хъия, винел акъуд, кӀубанар ая; гьа и вири крара сабур хуьх ва ибуралди рикӀивай тербет це. 3 Вучиз лагьайтӀа инсанри дуьз тербет кьабул тийидай вахт алукьда. Абуру ша лугьуз, чпин япариз хуш жедай гафар лугьудай муаллимриз яб гуда. 4 Абуру гьакъикъатдиз яб хгудач ва чпи туькӀуьрнавай гафарихъ яб акализ жеда. 5 Амма вун вири крара кьил кьилеллаз хьухь, четинвилер алуда, жуван кӀвалах ая – Шад Хабардикай муштулух це, жуван ибадат кьилиз акъуд. 6 Зи уьмуьр, къурбангандал ичӀирзавай затӀ хьиз, алахьна физва, зун атӀа дуьньядиз хъфидай вахт алукьзава. 7 За хъсандиз женг чӀугунва, жуван рехъ за звериз-звериз атӀанва ва иман хвенва, 8 исятда зун патал Реббиди, гьахъ-михьи Дуванбегди, Къияматдин юкъуз зав вугудай гьахъ-михьивилин таж гьазурнава, а таж неинки зав, гьакӀни кьарай авачиз Ам атун вилив хуьзвай вирибурув вугуда.

Кьилдин меслятар ва тӀалабунар

9 Зи патав фад акъатдайвал ая, 10 вучиз лагьайтӀа Димаса зун гадарнава. Адаз и дуьньядин няметар хъсан яз акуна ва Саланикдиз хъфена; Креск ГалатӀдиз хъфена, ТӀитӀ – Далматдиз. 11 Тек са ЛукӀа захъ галаз амукьна. Жувахъ галаз къачуна Маркни гъваш, зи ибадатда ада заз хъсандиз куьмекзава. 12 Туьхик за Эфесдиз ракъурна. 13 Зи патав къведайла, тӀалабда, зи абани гъваш, за ам Туругьасда КарпӀав туна, чарчин къаргъуярни яхъ, иллаки кӀелен хамунал кхьенвайбур.

14 Чатухъан Искендера заз гзаф зиян гана. Ада авур крарай Аллагьди Вичи адаз эвез хгуда. 15 Вунни адакай мукъаят хьухь, вучиз лагьайтӀа ам чна лугьузвай гафариз кӀевелай акси жезвай.

16 Сифте яз заз дувандал жува жув хуьдай мумкинвал хьайила, зи пад кьун патал садни атанач, вирида зун гадарна. И кар абурун тахсир яз гьисаб тавурай.

17 Амма Ребби зи патав гвай ва зи куьмекдалди и хабар вири халкьариз ван жедайвал вяз ийиз хьун патал Ада заз къуватар гана. Зун асландин сиве гьатуникай хиласна.

18 Реббиди идалай кьулухъни зун гьар жуьредин шийирдикай хиласда ва Вичин Цаварин Пачагьлугъдиз хутахна хиласда. Адаз эбеди яз шукур хьурай. Амин.

Эхирдин саламар

19 ПрискӀадиз ва Акуьлаз, гьакӀни Анисфаран кӀвализ салам лагь. 20 ЭрастӀ Каринфда амукьна, азарди кьунвай Тирафим за Милетда туна. 21 Кьуьд алукьдалди иниз къведайвал ая. Эвбула, ПӀуда, Лина, Клавдади ва вири стхайри ваз саламар лугьузва.

22 Къуй Ребби ви руьгьда аваз хьуй. Къуй Берекат квехъ галаз хьурай.