2Ti 1 | LezIBTNT | STEP | Аллагьди Вичи Иса Месигьдалди гуда лагьай уьмуьрдикай хабар гун патал хкягъай Иса Месигьдин илчи Павелан патай

‏ 2 Timothy 1

Саламар

1 Аллагьди Вичи Иса Месигьдалди гуда лагьай уьмуьрдикай хабар гун патал хкягъай Иса Месигьдин илчи Павелан патай 2 играми хва ТӀиматӀеяз.

Аллагь Бубадин ва чи Ребби Иса Месигьдин патай берекатар, регьим ва саламатвал хьурай ваз.

Шукур авун ва руьгь хкажун

3 Вахт-вахтунда ийизвай дуьайра вун за рикӀел гъизвайла, за Вичиз, зи бан-бубайри хьиз, михьи намусдалди ибадатзавай Аллагьдиз шукурзава. 4 Зи рикӀел ви накъвар хквезва ва заз вун акваз гзаф кӀанзава: а гьалтуни зун тежер кьван шадардай. 5 Зи рикӀел ви сидкьи иманни хквезва: гьа саягъда ви баде Лаисадивни, ви диде Эвникавни иман гвай, гьа гьахьтин иман вакни квайдахъ зун агъунва. 6 Гьавиляй за ви рикӀел хкизва: вуна, за вал гъилер эцигуналди, Аллагьдивай къачунвай пай, цӀай хьиз, къати хъия. 7 ГьикӀ лагьайтӀа Аллагьди чаз ганвайди кичӀевилин руьгь ваъ, къуватдин, муьгьуьббатдин ва дуьз фикирунин руьгь я.

8 Гьавиляй чи Аллагьдикай рахаз ва зун Адаз килигна къазаматда хьуникай регъуь жемир. Аксина, Аллагьдин къуватдихъ далу акална, вуна захъ галаз Шад Хабар себеб яз чӀугвазвай азабар пай ая. 9 Аллагьди чна хъсан крар авуна лугьуз ваъ, чакай вичин халкь хьун патал чун хиласна, Вичин берекатдив кьурвал чаз эверна. А берекат чаз Иса Месигьдилай дуьнья халкь хьайидалай вилик ганвай. 10 А берекат гила пайда хьана, яни ажал терг авур ва Шад Хабардалди цӀийи уьмуьр ва ажал авачирди къалурай чи Иса Месигь, чи Хиласкар атана. 11 Зун и Шад Хабардин чавушвиле, илчивиле ва муаллимвиле эцигнай. 12 Гьа и кардай за исятда азабар чӀугвазва, амма заз идакай регъуь туш, вучиз лагьайтӀа заз жува Нихъ иман авунатӀа чизва. Адалай, за Вичел вуч ихтибарнаватӀа, гьам Къияматдин йикъалди хуьз алакьдайдахъ за иман ийизва. 13 Завай ваз вуч ван хьанатӀа, къуй ваз гьадакай дуьз тербет гунин карда чешне хьурай. Иса Месигьдилай къвезвай иманни муьгьуьббат гваз уьмуьр твах. 14 Вал ихтибарнавай хъсан крар хуьз квек квай Пак Руьгьди куьмекрай.

15 Асия вилаятда вирида, гьабурухъ галаз Фуьгела ва Гьермагена, захъ далу элкъуьрна; и кар ваз чизва.

16 Къуй Реббиди Анисфаран кӀвализ регьим авурай, гьикӀ лагьайтӀа ада зун кӀубан ийиз хьанай, зун зунжурра хьана лугьуз регъуьвал авуначир. 17 Аксина, вич Римда авайла, ам кьетӀидаказ захъ къекъвез хьанай ва ада зун жагъурнай. 18 Къуй Къияматдин юкъуз Реббиди адаз регьим авурай. Ада заз гьикьван хъсанвилер Эфесдани авунатӀа, вазни хъсандиз чизва.