2Ti 3 | LezIBTNT | STEP | Чир хьухь, эхиримжи йикъара мишекъат вахт жеда.

‏ 2 Timothy 3

Эхиримжи йикъара Аллагь квадарун

1 Чир хьухь, эхиримжи йикъара мишекъат вахт жеда. 2 – 3 Инсанар гьар сад са вичин менфятдихъ гелкъведа, пулунал рикӀ алайбур, яцӀу гафар гвайбур, дамах гвайбур, асибур, диде-бубайриз яб тагудайбур, чпиз авур хъсанвал чир тежедайбур, са затӀни пак яз такьазвайбур, рикӀ авачирбур, туькӀуьн тийидайбур, буьгьтенар вегьидайбур, чпивай чеб кьаз тежедайбур, инсаф авачирбур жеда, абуруз хъсанвал такӀан жеда, 4 абур хаинвал ийиз жеда, туьнт жеда, дамах гваз жеда, абуруз Аллагьдивай гзаф лезетар кӀан жеда. 5 Муъминвал абур патал анжах винел патан къабух жеда, амма абуру муъминвилин гьакъикъи къуват инкар ийида. Ахьтинбурувай кьил къакъуд.

6 Абурун арада, кӀвалериз физ, гунагьдин пар алай ва акатай гьихьтин хьайитӀани ниятрин-гьевесрин чӀалал фидай, кьиле гар авай папар рекьелай алуддайбурни ава. 7 А папари датӀана чирвал къачузва ва сакӀани гьакъикъатдин гъавурда акьаз алакьзавач. 8 ГьикӀ Янисани Ямпереса Мусади лагьай гафариз аксивал авунатӀа, и ксарини гьакӀ гьакъикъатдиз аксивал ийизва. Ибур ява хьанвай, акьулни иман патал виже текъведай инсанар я. 9 Амма абурун алакьунар яргъал фидач, абурун ахмакьвал, Мусадин мидяйриз хьайивал, винел акъатда.

Илчийри къалурай чешне

10 – 11 Тербетда, уьмуьр тухунин къайдада, макьсадра, иманда, сабурда, муьгьуьббатда, мягькемвиле, АнтӀиахда, Канида, ЛуьстӀрада зи кьилел атай хурук кутунра ва азабра вуна зи рехъ кьуна. Гьихьтин акьалтӀай пис жуьреда зун хурук кутунар за эхна, амма вирибурукай зун Реббиди хилас авуна. 12 РикӀивайни Иса Месигьдихъ ийизвай имандихъ галаз туькӀвена уьмуьр тухуз кӀанзавай вири хурук кутада. 13 Пис ксар ва гьарамзадаяр чпин тапаррин юкьва мад ва мад дериндаказ акӀида ва абуру масадбурни алцурариз жеда. 14 Амма вуна ваз вуч чирнаватӀа, квелди вун алакьарнатӀа, Гьадахъ иман авун давамара, гьикӀ лагьайтӀа ваз ни чирвал ганатӀа, ваз чизва. 15 Ваз лап гъвечӀи чӀавалай Пак Калам чизва, Иса Месигьдихъ ийизвай имандин куьмекдалди ваз хиласвилихъ тухудай акьул гуз абурулай алакьда. 16 Вири Калам Аллагьди нефес гана илгьамда тунва, адакай чирвал гунин-къачунин, чӀуру крар винел акъудунин, дуьз хъувунин, гьахъ-михьивилин несигьат гунин жигьетдай хийир ава. 17 Ада Аллагьдин инсан гьихьтин хьайитӀани хъсан кар кьиле тухуз тамамдиз гьазур жедайвал ийизва.