Heb 10 | LezIBTNT | STEP | Мусадин Къанун гележегда инсанриз хьана кӀани берекатар чеб ваъ, анжах абурун хъен я. Гьавиляй Къанундивай датӀана, йисалай йисуз, гьа са къурбандар гун патал къвезвайбур тамамвилиз акъудиз жедач.

‏ Hebrews 10

Иса Месигь гунагьрай ганвай эхиримжи къурбанд я

1 Мусадин Къанун гележегда инсанриз хьана кӀани берекатар чеб ваъ, анжах абурун хъен я. Гьавиляй Къанундивай датӀана, йисалай йисуз, гьа са къурбандар гун патал къвезвайбур тамамвилиз акъудиз жедач. 2 ИкӀ тиртӀа, къурбандар авун акъвазардачирни мегер? Икрам ийизвайбур садра ва эбеди яз михьи жедай, абуру чпин гунагьрай чпик тахсир квайди мад гьисс хъийидачир. 3 Амма и къурбандар йисалай-йисуз авуни гунагь рикӀел хкизва, 4 вучиз лагьайтӀа яцаринни кьунарин ивидивай гунагьар арадай акъудиз жедач.

5 Гьавиляй, и дуьньядиз гьахьдайла, Месигьди лагьана:

«КӀан хьанач Ваз я къурбандар, я савкьватар,
амма Вуна Зун паталди гьазурна беден.
6 Шад ийизвач Вун я кунугрини,
я гунагьдай ийизвай къурбандрини.
7 Гьа чӀавуз За лагьана: „Ингье, Зун къвезва,
къаргъуда Закай кхьенвайвал,
Ви къаст кьилиз акъудун патал, я Аллагь!“» ^a

8 Гьа икӀ, Ада винидихъ лагьана: «КӀан хьанач Ваз я къурбандар, я савкьватар, я кунугар, я гунагьдай къурбандарни, абуру вун шад ийизвач». Вири ибур Къанунди кӀевелай тӀалабзавайвилизни килиг тавуна Ада икӀ лагьана. 9 Ахпа Ада алава хъувуна: «Ингье, Зун къвезва, Ви къаст кьилиз акъудун патал». Ада сад лагьайди къуватдай вегьизва ва кьвед лагьайди къуватда твазва. 10 Иса Месигьди Аллагьдин къаст кьилиз акъудайвиляй чун Адан Беден къурбанд авуналди садра ва эбеди яз пак авунва.

11 Гьар са хахамди, гунагьар арадай акъудиз тежедай гьа сад хьтин къурбандар мад ва мад ийиз, йикъай юкъуз вичин везифаяр кьилиз акъудзава. 12 И Кьилин хахамди, лагьайтӀа, гунагьрай тек са къурбанд авуна ва Ам эбеди яз Аллагьдин эрчӀи гъилихъай ацукьна. 13 Гьа чӀавалай инихъди Ада Вичин душманар Вичин кӀвачерик вегьидай сят вилив хуьзва. 14 Пак ийизвайбур Ада са къурбанддалди даим яз тамамвилив агакьарна. 15 Идан гьакъиндай чаз Пак Руьгьдини шагьидвалзава. Эвелдай Ада лугьузва:

16 «За гележегда абурухъ галаз
ахьтин Икьрар кутӀунда хьи, – лугьузва Реббиди, –
Зи Къанунар За абурун рикӀера твада
ва абурун бейнида кхьида» ^b.

17 Ахпа Ада алава хъийизва:

«Абурун гунагьар ва абурун Къанун чӀурунар
За мад рикӀел хкидач» ^c.

18 Гунагьдилай гъил къахчур чӀавуз гунагьдай къурбанд гунин лазимвал мад амукьзавач.

Имандал кӀевиз акъвазун патал эвер

19 Стхаяр-вахар, Исадин Иви себеб яз чавай гила Паквилерин Пак чкадиз викӀегьдиз гьахьиз жеда. 20 Ада чаз пердедай ^{▼▼Перде – Аллагьдин КӀвале Паквилерин Пак чка кӀевнавай перде. Иса Месигьдин кьиникьи аниз гьахъдай мумкинвал гана (кил.: Марк 15:38).} фидай цӀийи ва уьмуьр гудай рехъ ахъайна. И кар Ада Вичин Беден къурбанд гуналди авуна. 21 Ва чаз Аллагьдин кӀвалин кьиле акъвазнавай Кьилин хахам ава. 22 ГьакӀ хьайила, ша чун халисан рикӀер гваз, имандив ацӀанваз, иви хъичир авуналди рикӀер рехне квай виждандикай михьи авуна ва беденар михьи цяй чуьхвена, Аллагьдиз мукьва жен. 23 Ша чна умуд гузвай имандикай шагьидвал авун ян тагана кьан, вучиз лагьайтӀа чаз гаф Гайиди гьакъикъи я. 24 Ша чун сад садав дикъетдивди эгечӀин, сада садаз муьгьуьббатдив ацӀуз ва дугъри крар ийиз кӀан жедайвал ийин. 25 Са бязибуруз хесет хьанвайвал, чна чи кӀватӀ хьунухьар гадар тийин. Аллагьдин югъ мукьва жезвайди аквазвай чӀавуз сада сад мад ва мад кӀубанар ийин.

26 Вучиз лагьайтӀа, чна, гьакъикъат кьатӀана, чиз-чиз гунагьар авун давамарайтӀа, мад са къурбанддивайни и гунагьрилай гъил къахчудайвал ийиз жедач. 27 Ихьтин дуьшуьшда чаз амукьзавайди дувандал ва Аллагьдин душманар недай пехъи цӀал кичӀела вил алаз акъвазун я. 28 Мусадин Къанундилай кам вегьейди кьве ва я пуд шагьиддин гафарикай даях кьуналди са инсафни тавуна кьиникьиз акъуддай. 29 АкӀ хьайила, куь фикирдалди, Аллагьдин Хциз кӀур гузвайди, вич Икьрардин Ивиди пак авунатӀани, а иви са квяйни такьазвайди ва берекатдин Руьгь русвагьзавайди гьикьван кӀеви жазадиз лайих я? 30 Чаз Ам чизва, Ни икӀ лагьанатӀа: «Кьисас Зи Гъиле ава, За эвез хгуда» ^e ва мадни: «Реббиди Вичин халкьдин дуван ийида» ^f. 31 Чан алай Аллагьдин Гъиле гьатун кичӀе жедай кар я!

32 Куьн имандал атайдалай гуьгъуьниз куьне залан азабриз дурум гайи виликан йикъар рикӀел хкваш. 33 Квекай садбур хъуьруьнриз вегьидай ва куь геле къекъведай, амма квекай муькуьбур гьахьтин азабар эхзавайбурухъ галаз къуьн-къуьневаз акъваздай. 34 Куьне зинданра авайбурун язух чӀугвадай; куь эменни къахчур чӀавара куьн гьатта шадни жедай, вучиз лагьайтӀа квез квехъ лап хъсан, эбеди эменни авай чӀал чизвай.

35 ВикӀегьвал квадармир, и кардай квез жумарт савкьват гуда.

36 Аллагьдин къаст кьилиз акъудайла, Ада квез хиве кьурди къачун патал, куьн кӀевиз акъвазун герек жеда, 37 Каламди кхьенвайвал:

«Са кӀусни яргъал алач, гьич яргъал алач,
Вич атана лазим Тирди
геж тавуна акъатда.
38 Зи Гьахъ-михьиди имандалди чан алаз жеда,
амма Ам Захъ иман авуникай кьулухъ хьайитӀа,
жеда Зун Адалай нарази» ^g.

39 Амма чун кьулухъ чӀугуна рекьидайбурукай ваъ, имандал атана хиласвал къачузвайбурукай я.