‏ Hebrews 11

Имандикай

1 Иман – им вуч вилив хуьзватӀа гьадахъ агъун я, таквазвайдал шак тагъун я. 2Къадим инсанри ихьтин иман гваз уьмуьр тухвана ва абуру тариф къачуна.

3Анжах имандалди чун гъавурда акьазва хьи, каинат Аллагьдин Гафуналди халкь авунва, ва вири аквазвай кьванди таквазвайдакай халкь хьанва.

4Иман себеб яз Гьабила Аллагьдиз Къабила авурдалай хъсан къурбанд ганай. Аллагьди адан къурбанддин тариф авур чӀавуз ада гьахъ-михьи кас яз имандалди Реббидин разивал къачунай. Гьабил кьенатӀани, вичин имандалди ам гьеле рахазма.

5Иман себеб яз Гьенух, ажал такуна, и дуьньядай къахчунай. Ам жагъур хъийиз жезвачир, вучиз лагьайтӀа ам Аллагьди къахчунвай. Амма ам къахчудайдалай вилик ам Аллагьдиз кӀандайвал авур кас яз гьалалвилив агакьнай.

6Иман гвачиз Аллагьдиз кӀандайвал авун жедай кар туш, вучиз лагьайтӀа Адан патав къвезвай гьар сада Аллагь авайдахъ ва Ада Вич жагъурзавайбуруз савкьват гудайдахъ иман авун лазим я.

7Аллагьди Нуьгьав гьеле акваз хьун мумкин туширдакай тагьким агакьарайла, ада вичин хизан хиласун патал гими имандалди Аллагьдиз ийизвай чӀехи гьуьрметдивди туькӀуьрнай. Нетижада дуьньядиз кар атӀанай, амма Нуьгьакай имандин куьмекдалди къведай гьахъ-михьивилин ирссагьиб хьанай.

8Вичиз гележегда ирс яз гуда лагьай чилел фин патал Аллагьди эверай Ибрагьим, вич гьиниз физватӀа чизвачиртӀани, имандалди муьтӀуьгъ хьанай ва фенай. 9Вичиз хиве кьур чилел ам патан кас хьиз имандалди уьмуьр тухуз акъвазнай, чпизни гьахьтин кар хиве кьунваз адахъ галаз санал ирссагьибар тир Исакьни Якьуб хьиз, алачухра хьанай, 10вучиз лагьайтӀа ада мягькем бинейрал акъвазнавай, Аллагь Вич устӀарни фяле тир шегьер вилив хуьзвай.

11Вичиз аялар жезвачиртӀани, Саррадилай имандивди гьакьван чӀехи яшда аваз руфунал залан жез алакьна, гьикӀ лагьайтӀа ада вичиз гаф Гайида гаф хуьдайдахъ далу акалнавай. 12Гьа икӀ, беден саки кьенвай са касдилай, цава гъетер ва гьуьлуьн кьере къумадин тварар гьикьван аватӀа гьакьван инсанар хьанай.

13Вири и инсанар, иман гваз, чпиз хиве кьурди агакьдалди гьакӀ кьена фенай. Абуруз анжах яргъай аквазвай ва абуру вири а крар хъсанбур яз кьазвай. Чеб и чилел анжах къурабаяр ва ина-ана къекъвезвайбур тирди абуру хиве кьазвай. 14Чеб ихьтинбур яз гьисабзавайбуру идалди чпи чпин халисан ватан жагъурзавайди къалурзавай. 15Абуру анжах чпи туна экъечӀнавай уьлкведикай фикирзавайтӀа, абурувай аниз хквезни жедай. 16Амма гьакъикъатда абуру хъсан уьлкведихъ – цавун уьлкведихъ гьерекатзавай. Гьавиляй Аллагьдиз Вич абурун Аллагь я лугьуз регъуь туш – Ада абур патал шегьер гьазурнай эхир.

17– 18Аллагьди Ибрагьим синагъ ийидайла, ада имандалди Исакь къурбанд авунай. Ам вичин авай-авачир са хва къурбанд ийиз гьазур тир. Аллагьди адаз гаф гун яз: «Ви тухум Исакьа давамарда» ^a лугьунизни Ибрагьим килигначир, 19вучиз лагьайтӀа ада Аллагьдивай гьатта кьейибурални чан хкиз жедайди яз гьисабзавай; чӀагай жуьреда лугьун хьайитӀа, Исакь ада гьакъикъатдани кьейибурун арадай къахчунай.

20Имандалди Исакьа Якьубанни Эсаван гележегдиз нуьсрет ганай.

21Рекьидай гьалда авайла, Якьуба имандалди Юсуфан рухвайрикай гьар садаз нуьсрет ганай ва, вичин кӀекӀецдал гьалч хьана, Аллагьдиз икрам авунай. 22Исраилвияр Мисридай экъечӀуникай Юсуфа имандалди вичин уьмуьрдин эхирда лагьанай ва вичин кӀарабрин гьакъиндай эмир ганай. 23Муса хайидалай гуьгъуьниз адан диде-бубади имандалди ам пуд вацра чинеба хвенай, вучиз лагьайтӀа абуруз ам иер аял тирди аквазвай, ва пачагьдин фарманди абурук кичӀ кутуначир. 24ЧӀехи хьайила, Мусади имандалди вичиз фиръавандин рушан хва лугьуникай кьил къакъуднай. 25Куьруь вахтуналди тир гунагькар лезетрикай кеф хкудунилай жуван халкьдихъ галаз дарда тунвайди хьун адаз хъсан яз акунай. 26Вич виликай гьихьтин савкьватди вилив хуьзватӀа адаз аквазвай, ва гьавиляй адаз Месигьдин хатурдай русвагьвиле хьун Мисридин девлетрилай багьа тир. 27Пачагьдин хъилекай кичӀе тахьана, ам имандалди Мисридай экъечӀнай. Ада, Таквазвайди вичин вилик кваз аквазвай касди хьиз, вири эхнай. 28Имандалди ада Песагь кьилиз акъуднай, сифтегьан аялар тергзавайдавай исраилвийрин аялрик кягъиз тежедайвал ракӀарин гуьрцелриз иви хъичирнай.

29Халкь имандалди НацӀун гьуьляй, къураматдилай хьиз, фенай; мисривиярни, гьакӀ физ алахъайла, цик акатнай.

30Исраилвийри галаз-галаз ирид юкъуз шегьердал чархар ягъайдалай гуьгъуьниз имандикди Еригьандин цлар ацахьнай.

31Имандалди Исраилдин жасусар ислягьдаказ кьабулай къагьбе Рагьаб иман гвачирбурухъ галаз санал телеф хьаначир.

32Мад хълагьунин лазимвал авани? Вахт тӀимил хьуни заз Гидегьанакай, Баракьакай, Шимшанакай, Ифтагьакай, Давудакай, Смаилакай ва пайгъамбаррикай рахадай мумкинвал гузвач. 33Абуру имандалди пачагьлугъар муьтӀуьгъарзавай, гьахъ-михьивал арадал хкизвай, чпиз хиве кьурди къачузвай, асланрин сивер кӀевзавай, 34абур къати цӀун къене кузвачир, турунин мурцакай хилас жезвай. Абурун зайифвал къуватдиз элкъвезвай, абур ягъ-ягъунра мягькем жезвай ва абуру чара уьлквейрин кьушунар катуниз мажбурзавай. 35Папарин патав абурун кьейи, чпел чан хтанвай, мукьвабур хквезвай. Муькуьбур хъсан уьмуьр паталди чпел чан хтун вилив хуьн патал, чпиз теклифнавай азадвал кьабул тавурвиляй азабрик кутунай. 36Муькуьбуру чпел ийизвай хъуьруьнарни гатунар, гьакӀни зунжурарни зиндан эхи ийизвай. 37Абуруз къван гузвай, абур кьве кьатӀ ийизвай, турунив яна рекьизвай, абур хпен ва цӀегьрен хамар алукӀна сиягь жезвай, абур муьгьтежвиле авай, абурун геле къекъвезвай ва абурукай ягьанатар ийизвай. 38Чпин лайихдив дуьнья агакь тийизвайбур кьурумра, дагълара, магъарайра, дагьарра сиягь хьанвай.

39Чпин имандай абуру Аллагьдин патай гьалалвал къачунай, амма абурукай садани чпин уьмуьрда чпиз хиве кьунвайди къачуначир, 40вучиз лагьайтӀа, анжах чахъ галаз санал абур тамамвилив агакьун патал, Аллагьди чун паталдини хъсан са вуч ятӀани виликамаз гьазурнава.