‏ Hebrews 13

Эхиримжи несигьатар

1ДатӀана садаз сад стхаяр-вахар хьиз кӀан хьухь. 2Мугьманар кӀан хьунухь рикӀелай алудмир: икӀ авуналди, бязибуру, чпизни хабар авачиз, малаикар мугьманвиле кьабулна. 3Зинданра авайбур, гуя куьнни абурухъ галаз къазаматда авай хьиз, рикӀел хуьх ва кьиле твах. Азаб чӀугвазвайбур, гуя куьнени абурухъ галаз азаб чӀугвазвай хьиз, рикӀел хуьх.

4Къуй вирида некягьда сад хьунухьиз гьуьрмет авурай ва чпин некягьдик квайбуруз вафа хуьрай. Аллагьди гъуьлуьз ва я папаз вафа хуьзвачир вирибурун ва явавилин тахсир квайбурун дуван аквада. 5Пул кӀан хьуникай азад хьухь, квехъ авайдал рази хьухь, вучиз лагьайтӀа Аллагьди лагьана:

«За садрани гадардач вун,
ви патавай хъфидач» ^a.

6Гьавиляй чавай агъунваз лугьуз жеда:

«Ребби заз куьмек гузвайди я,
са куьникайни кичӀе туш заз.
Инсандивай заз вуч ийиз жеда кьван?» ^b

7Квез Аллагьдин Гаф чирай куь несигьатдарар рикӀел хуьх, ва, абурун уьмуьрдин къени нетижайриз килигиз, абурун имандилай чешне къачу. 8Иса Месигь накьни, къени, гьамишандани гьа Гьам я.

9Къуй куьн акатай гьихьтин хьайитӀани патан чирвилери гьакъикъатдивай къакъуд тавурай. РикӀер чеб тӀуьниз талукь яз кхьенвай серенжемралди ваъ (абуру чпел амал авурбуруз хийир гъанач), Аллагьдин берекатдалди мягькем хьайитӀа, хъсан я. 10Чахъ Гьалтунин Алачухда къуллугъ ийизвайдавай вичелай затӀ недай ихтияр авачир къурбанган ава. 11Кьилин хахамди гьайванрин иви Паквилерин Пак чкадиз тухузва – им гунагьдай къурбанд я, гьайванрин жендекар, лагьайтӀа, кундин сергьятрилай къеце кузва. 12Гьавиляй Исадини, Ада Вичин Ивидалди халкь пак авун патал, шегьердин варарилай къеце азабар чӀугунай. 13Гьа икӀ ша чунни, Ам акатай русвагьдик чунни акатдайвал, кундилай къецез Адан патав фин. 14Вучиз лагьайтӀа ина, чилел, чаз шегьер авач, чна гележегдин шегьер вилив хуьзва.

15Ша Исадин куьмекдалди чна Аллагьдиз Адан ТӀварцӀин тарифзавай пӀузаррай акъатзавай тарифдин къурбанд датӀана гун. 16Хъсанвал авун ва квехъ авайди муьгьтежвиле авайбурухъ галаз паюн рикӀелай алудмир, – ихьтин къурбандар Аллагьдиз хуш я.

17Куь несигьатдаррин чӀалаз килиг ва абуруз табий хьухь. Вучиз лагьайтӀа абуру вил алуд тийиз куь къайгъу чӀугвазва, абуру чпин зегьметдин гьакъиндай Аллагьдиз гьахъ-гьисаб авуна кӀанда. Абурувай чпин къуллугъ шаддаказ кьиле тухуз хьун патал суза тийиз алахъа, вучиз лагьайтӀа идакай квез хийир авач.

18Чи гьакъиндай дуьа ая. Чи виждан михьи тирдахъ чун агъунва ва вири крар дуьздаказ ийиз алахъзава. 19Завай куь патав фад хквез хьунин гьакъиндай дуьа авун за квевай лапни кьетӀендиз тӀалабзава.

Нуьсретар гун ва эхиримжи саламар

20Къуй Аллагьди, саламатвилин Чешмеди, эбеди Икьрар мягькемарзавай иви себеб яз чи Ребби Исадал – Вичин хиперин чӀехи Чубандал кьейидалай кьулухъ чан Хкайда, 21куьн Адан къаст кьилиз акъудун патал къенивиле мягькем авурай. Ада Вичиз кӀани крар ча кьилиз акъудун патал къуй Иса Месигьди куьмек гурай. Асиррилай асирралди Адаз шукур хьурай. Амин.

22Стхаяр-вахар, за квевай и несигьатдин гафарив сабурдивди эгечӀун кӀевелай тӀалабзава, гьикӀ лагьайтӀа зи чар куьруьди я.

23Чи стха ТӀиматӀей азад хъувунвайди чир хьухь. Мукьвара ам иниз атайтӀа, за адахъ галаз санал квел кьил чӀугвада.

24Куь вири несигьатдарриз ва Аллагьдиз талукьбуруз саламар. Италдай тир иманийрини квез саламар лугьузва.

25Къуй берекат квехъ виридахъ галаз хьурай.