Hebrews 3
Аллагьдин рекье аваз фин
1Гьавиляй, Аллагьдиз талукь стхаяр-вахар, цавариз эвернавай амадагар, куьн чна Вичикай шагьидвал ийизвай, Вич Ракъурнавайди ва Кьилин хахам тир Исадиз килиг. 2Мусади вири Аллагьдин кӀвале вафа хуьзвайвал, Вичин хиве къуллугъ Вугайдаз Исадини вафа хуьзвай. 3КӀвал эцигайдаз кӀвалелай гзаф гьуьрмет ийидайвал, Иса Мусадилайни гзаф гьуьрметдиз лайих хьана. 4Гьелбетда, гьар са кӀвалихъ вич эцигайди ава. Аллагь лагьайтӀа, вири эцигайди я. 5Мусадин къуллугъди гележегда куьн гьакъиндай хабар гун лазим ятӀа къалурзавай. Ам къуллугъдар хьиз Аллагьдин вири кӀвале вафа гваз хьана. 6Месигьди лагьайтӀа, хци хьиз, Аллагьдин кӀвал вафа гваз идара ийизва. Чна эхирдалди викӀегьвал ва чна вичел дамахзавай умуд хвейитӀа, Адан кӀвал чун я. 7Гьавиляй, Пак Руьгьди лугьузвайвал жеда: «Къе Адан ван хьайитӀа,8 терс ийимир рикӀер куь,
куьн гъулгъула гваз къарагъайла авур хьиз
кьурумда синагъдин юкъуз.
9 Ана Зун куь бубайри синагъ авунай,
Зи крар абуруз акунвайтӀани яхцӀур йисан муьгьлетда.
10 Гьавиляй Заз такӀан хьана а несил
ва лагьана: „Абурун рикӀер датӀана
алатзава рекьелай,
чизвач абуруз рекьер Зи.“
11 Гьавиляй За кьин кьуна, Зун Зи хъиле авайла:
„абур гьахьдач лагьана секинвилиз Зи!“» a
12Стхаяр-вахар, квекай садан рикӀни хъел квайди ва иман авачирди тахьун патал ва ам чан алай Аллагьдивай чара тахьун патал, кӀевиз акъваз. 13И «къе» гафунин алакъа чахъ галаз амай кьван гагьда, гунагьди вичел рикӀ ацукьарна садни рекьяй акъуд тийидайвал ва квекай садни терс тийидайвал, сада садаз гьар юкъуз и кар тагьким ая. 14Чна чаз эвелдай авай хьтин кӀеви иман лап эхирдалди хвейитӀа, чакай Месигьдин юлдашар жеда. 15Ва мадни лагьанва: «Къе Адан ван хьайитӀа,
терс ийимир рикӀер куь,
куьн гъулгъула гваз
къарагъайла авур хьиз». b
16И гафар ван хьана, акси хьайибур вужар тир? Мисридай Муса кьиле аваз экъечӀай вирибур тушни? 17ЯхцӀур йисан къене Аллагьдиз никай хъел авай? Гунагь авурбурукайни чпин беденар кьурумда пуч хьайибурукай туширни кьван? 18Абур Вичин секинвилиз гьахьдач лагьана Аллагьди низ кьин кьунай? Вичин чӀалаз килиг тийизвайбуруз туширни кьван? 19Абурувай чпихъ иман тахьун себеб яз гьахьиз тахьайди чаз аквазва.
Copyright information for
LezIBTNT