Heb 4 | LezIBTNT | STEP | Амма гьеле геж туш, Аллагьди Вичин секинвилиз гьахьуникай ганвай гаф къуватда ама. Гьавиляй, ша чна дикъет хуьн, квекай садни и секинвилив агакь тавуна амукь тийидайвал.

‏ Hebrews 4

1 Амма гьеле геж туш, Аллагьди Вичин секинвилиз гьахьуникай ганвай гаф къуватда ама. Гьавиляй, ша чна дикъет хуьн, квекай садни и секинвилив агакь тавуна амукь тийидайвал. 2 ГьикӀ лагьайтӀа, и гъулгъула гваз къарагъайбуруз хьиз, чазни Шад Хабардикай муштулух ганай, амма и хабарди абуруз са хийирни гъаначир, вучиз лагьайтӀа абуру а хабар иман яз кьабулначир. 3 Амма чун, имандал атанвайбур Адан секинвилиз, Аллагьди лагьанвайвал, гьахьда:

«Гьавиляй За кьин кьуна, Зун Зи хъиле авайла:
Зи секинвилиз гьахьдач абур!» ^a

И секинвал дуьнья халкь авур лап эвелдилай авазва, 4 вучиз лагьайтӀа Ада ирид лагьай йикъакай икӀ лагьанва: «Ирид лагьай юкъуз Аллагьди Вичин вири крарикай секинвиле ял яна» ^b. 5 Амма винидихъ лагьанвай: «Зи секинвилиз гьахьдач абур!» ^c

6 Гьа икӀ аниз гьахьун бязибурун вилик гьеле кумазма ва виликдай чпиз секинвилиз гьахьуникай муштулух гайибурни аниз, абуру чӀалаз килиг тавун себеб яз, гьахьначир. 7 Гьавиляй Аллагьди мад гъилера тайин югъ тестикьарна, – «къе». Гзаф вахтар алатайдалай гуьгъуьниз и кардикай, винидихъ гъанвай гафара авайвал, Давудан куьмекдалди хабар ганай: «Къе Адан ван хьайитӀа, терс ийимир рикӀер куь» ^d. 8 Ихтилат абуруз Нунан хва Шуая гайи секинвиликай физвайтӀа, Аллагь и йикъалай гуьгъуьниз къвезвай са гьи ятӀани маса йикъакай мад рахадачир. 9 Гьавиляй Кишдин секинвал Аллагьдин халкь паталди яз амукьзава. 10 ГьикӀ лагьайтӀа, вуж Аллагьдин секинвилиз гьахьайтӀа, адани вичин зегьметрикай, Аллагьди Вичин зегьметрикай ял ягъайвал, секинвиле ял яда. 11 Гьавиляй, а секинвилиз гьахьун патал, чӀалал татунин атӀа чешнедин рехъ кьуна садни пуч тахьун патал, ша чна алакьдай кьван вири ийин.

12 Аллагьдин Гафунал чан ала ва ам кардик ква, ам кьве мурзни хци гьар са турунилайни хци я ва ам чи асулдин лап деринриз сух жезва, ам руьгьдивни рикӀив, жалгъайрив ва кӀарабдин мефтӀедив агакьзава. Ада рикӀин фикирризни къастариз къимет гузва. 13 Халкьнавай кьван виридакай са затӀни Адакай чуьнуьх хьанвач. Адан вилик вири чуплах я, Адан вилериз вири аквазва. Чна Адаз чи гьахъ-гьисаб авун лазим я.

Иса кьилинбурукай лап чӀехи Хахам я

14 Чахъ цавар кӀвачелай авунвай кьилинбурукай лап чӀехи хахам ава – Аллагьдин Хва Иса. Гьавиляй ша чна вичелай шагьидвал ийизвай гьакъикъат кӀевиз кьан. 15 Чи Кьилин хахам чи зайифвилера чи рикӀикай хабар такьадайбурукай туш. Чун хьиз, Гьамни, вири краралди синагъ авуна рекьяй акъудиз алахънай, амма Ада гунагь авуначир. 16 Гьавиляй, чав регьим агакьдайвал ва чавай вахтунда къведай куьмекдин берекат къачуз жедайвал, ша чун викӀегьдиз берекатдин тахтуниз мукьва жен.