Hebrews 5
1ГьикӀ лагьайтӀа, гьар са кьилин хахам инсанрин арадай хкязава ва, авур гунагьрай Аллагьдиз савкьватарни къурбандар гуз, Аллагьдин вилик инсанрин патай векилвал авун патал ам къуллугъда акъвазарзава. 2Ихьтин кьилин хахамдилай чпиз затӀни течидай, рекьелай алатнавайбурун гъавурда акьаз алакьда, вучиз лагьайтӀа адаз вичизни зайифвилер хас я; 3и кар себеб яз ада, халкьдин гунагьрай хьиз, вичин хсуси гунагьрайни къурбандар авун герек я. 4Ихьтин гьуьрмет инсандивай вичивай вичиз ийиз жедач, адаз, вичин вахтунда Гьаруназ эверайвал, Аллагьди эверда. 5Кьилин хахам хьуналди, Месигьдини ихьтин гьуьрмет Вичи Вичивай къалурначир, амма Адаз и гьуьрмет ихьтин гафар Лагьайда ганай: «Гила Вун Зи Хва,Инлай кьулухъ жеда Закай Буба Ваз». a
6Маса чкадални Ада лугьузва: «Вун хахам я даим яз
Мелик-Садикьан дережадив кьур хьтин». b
7Чилел тухвай Вичин уьмуьрдин вахтунда Исади Вич ажалдикай хилас ийиз жедай Аллагьдиз кӀевидаказ, сузадалди ва накъвар авахьиз дуьа авунай. Аллагьдиз ийизвай чӀехи гьуьрметдай Адан ван агакьнай. 8Ам Хва хьунизни килиг тавуна, Адаз Вичин азабрин куьмекдалди чӀалаз килигиз чир хьана. 9Тамамдиз гьазур хьайила, Адакай Вичин чӀалаз килигзавайбур патал эбеди хиласвилин чешме хьана. 10Аллагьди Адаз Мелик-Садикьан дережадив кьур хьтин Кьилин хахамвал тайинарна.
Жуван фикиррилай элкъуьникай тагьким
11И кардикай чавай мадни гзаф рахаз жедай, амма куьн идан гъавурда тун четин я, вучиз лагьайтӀа квелай гъавурда гьатиз алакьзавач. 12Вахтуниз фагьум гайитӀа, квекай муаллимар жедай чӀав хьанва, амма квез Аллагьдин Гафунин кьилин гьакъикъатар чирдай муаллимар гьелелиг герекзама. Куьне кӀеви тӀуьн тӀуьна ваъ, мад нек хъвана кӀанзава. 13Нек хъвазвай гьар сад гьеле бицӀек я, адаз гьахъ-михьивиликай хъсан чирвал авач. 14КӀеви тӀуьн чпин гьиссериз тежрибади гьина хъсанвал, гьина писвал аватӀа чирнавай акьулбалугъ инсанар паталди я.
Copyright information for
LezIBTNT