Heb 6 | LezIBTNT | STEP | Гьавиляй Месигьдин тербетдин бинейрилай акьулбалугъбур патал вуч тайинарнаватӀа гьадал элячӀин. Ажалдихъ тухузвай крарай Аллагьдин рекьел атуникай, Адахъ иман авуникай,

‏ Hebrews 6

1 Гьавиляй Месигьдин тербетдин бинейрилай акьулбалугъбур патал вуч тайинарнаватӀа гьадал элячӀин. Ажалдихъ тухузвай крарай Аллагьдин рекьел атуникай, Адахъ иман авуникай, 2 цик акахьун къачуникай, гъилер эцигуникай, кьейибурал чан хтуникай ва эбеди дувандикай чун мад гъилера чирвилер гуналди рахадач. 3 И кар чна, Аллагьди ихтияр гайитӀа, ахпа ийида.

4 Вучиз лагьайтӀа са гъилера чпиз чирвал гайибур, чпиз цавун савкьватдин тӀеам акурбур ва Пак Руьгьдив шерик яз хьайибур, 5 гьакӀни Аллагьдин дугъри Гафунин ва къведай асирдин къуватдин тӀеам акурбурувай, 6 амма идалай гуьгъуьниз имандивай къакъатайбурувай, Аллагьдин рекьел хквез жедач. Абуру Аллагьдин Хва хъуьруьнриз вегьиз, чпиз зиян гун яз, цӀийи кьилелай хашуниз язава.

7 Мукьвал-мукьвал къвазвай марф хъвазвай ва вичихъ гелкъвезвайдаз бегьер гъизвай чилиз Аллагьди нуьсрет гузва. 8 Амма вичел тек са эчӀеларни цацар экъечӀнавай чил виже къведач. Ам негь авунин хатадик ква, адан эхир цӀай яна кун жеда.

9 Зи рикӀ алайбур, чна икӀ лугьузватӀани, куьн хъсан гьалда авайдахъ ва хилас хьунихъ куьн галкӀанвайдахъ чун агъунва. 10 Аллагь гьахъ гвачирди туш. Я куь зегьметар, я куьне Аллагьдиз талукьбуруз къуллугъ авуналди ва гилани ийизвай къуллугъ давамаруналди къалурзавай муьгьуьббат Аллагьди рикӀелай алуддач. 11 Куь умуд кьилиз акъатунин хатурдай чаз квекай гьар сада ахьтин чӀехи гьакъисагъвал ^{▼▼Гьакъисагъвал – гьахъ-намус хьунухь.} эхирдалди къалурна кӀанзава. 12 Чаз куьн темпел хьана ваъ, чпин имандалди ва сабурдалди чпиз гуда лагьанвайди ирс яз кьабулзавайбурулай куьне чешне къачунайтӀа кӀандай.

Вичи гайи гафариз Аллагьдин вафа

13 Ибрагьимаз гаф гудайла, Аллагьди Вичи Вичел кьин кьунай, вучиз лагьайтӀа вичел кьин кьаз жедай хьтин мад садни авачир. 14 Ада лагьана: «За гьикӀ хьайитӀани ваз нуьсрет гуда ва ви эвледрин кьадар гзафди ийида» ^b. 15 Гьа икӀ, сабурдивди вил алаз, Ибрагьимав вичиз хиве кьурди агакьна.

16 Инсанри чпелай артух тир са квел ятӀани кьин кьазва; лагьай гафар кьине тестикьарзава ва гьар гьихьтин хьайитӀани гьуьжетдал эхир эцигзава. 17 ГьакӀ Аллагьдини Вичи хиве кьур крарин ирссагьибриз Вичин ниятар дегиш тежедайбур тирди мадни ачухдиз къалуриз кӀан хьайи чӀавуз Ада а ниятар кьин кьуналди тестикьарнай. 18 Гьавиляй дегиш тежедай ва чеб Аллагьдин патай тирла таб квачирбур жедай и кьве кардивай – гаф гунивай ва кьиневай – чна гзаф чӀехи кӀубанвал къачузва. Чун, лагьайтӀа, Аллагьдивай далда жагъайбур ва чи вилик квай умуддик ккӀанвайбур я. 19 И умуд чи руьгь патал мягькем ва вичик умуд кутаз жедай лабар ^{▼▼Лабар – гими гьуьлел акъвазарун патал вичихъ яргъи зунжур галай залан къармах.} я. И умудди чаз пакханадин къенез, ам кьве пайзавай пердедин а патаз, 20 Вичикай эбеди яз Мелик-Садикьан дережадив кьур хьтин Кьилин хахам хьана, чи вилик кваз фейиди тир Иса гьахьай чкадиз гьахьдай ихтияр гузва.