‏ Hebrews 7

Мелик-Садикь ва Иса

1И Мелик-Садикь Салимдин пачагь ва виридалайни вине авай Аллагьдин хахам тир. Адал пачагьрал гъалибвал къачурдалай гуьгъуьниз дяведай хквезвай Ибрагьим гьалтна ва Мелик-Садикьа адаз нуьсрет гана. 2Ибрагьима душманривай вичин гъиле гьатай затӀарин цӀудай са пай адаз гана. Адан «Мелик-Садикь» лугьудай тӀвар «гьахъ-михьивал гвай пачагь» лагьай чӀал я, адан «Салимдин пачагь» лугьудай дережадин манани «саламатвал гъизвай пачагь» жезва. 3Я адан бубадикай, я адан дидедикай, я адан маса бан-бубайрикай, адан уьмуьрдин я эвелдикай, я эхирдикай санани кхьенвач, амма ам, Аллагьдин Хва хьтинди авунваз, эбеди яз хахам яз ама.

4Ам гьикьван чӀехи тиртӀа килиг! Гьатта чи бан-буба Ибрагьимани адаз дяведа къакъудайдан цӀудай са пай ганай. 5Къанунда са тагькимда къалурнавайвал, чпикай хахамар хьайи Левидин тайифадикай тирбуруз халкьдиз къвезвай хийирдин цӀудай са пай къачудай ихтияр ава. Абуру и пай чпин стхайривай, гьабурни Ибрагьиман эвледар ятӀани, кӀватӀзава. 6Амма Мелик-Садикьа, вич Левидин тайифадай тушиз, Ибрагьиман хийирдин цӀудай са пай кьабулна ва адаз, Аллагьдин патай гаф ганвайдаз, нуьсрет гана. 7Агъада авайдаз винеда авайда нуьсрет гузва (идал садани са шакни гъизвач). 8Къвезвай хийирдин цӀудай са пай адет яз ажал галай инсанри кьабулзава, амма Мелик-Садикьакай адал чан ала лагьана шагьидвал авунва. 9Лугьун хьи, цӀудай са пай къачузвай Левиди вичини къвезвай хийиррин цӀудай са пай, Ибрагьима кьил кутурвал, Мелик-Садикьаз гана, 10вучиз лагьайтӀа Мелик-Садикьал Ибрагьим гьалтайла, гьеле дидедиз тахьанвай Леви Ибрагьиман ятурра авай.

11Тамамвилив левийрин хахамвилин куьмекдалди агакьзавайди тиртӀа (абурун хахамвал халкьдиз ганвай Къанундин асул кар алай пай тир), Гьарунан дережадив ваъ, Мелик-Садикьан дережадив кьур хьтин маса хахамдин лазимвал жедайни мегер? 12Хахамвал дегиш жедай береда Къанунни дегиш авун мажбур жеда. 13Исятда Никай ихтилат физватӀа, Гьам садани ва садрани къурбангандин патав къуллугъ тавур тайифадикай тир. 14Малум я хьи, чи Ребби Ягьудан тайифадай тир, ва Мусади и тайифадай тир хахамрикай са гафни лагьанвач. 15Чаз мадни хъсандиз ачух жезва хьи, Мелик-Садикьан дережадин маса хахам пайда жедайла, Къанун дегиш хьана. 16Тайин тайифадиз талукь хьун важиб яз кьазвай тагькимдалди ваъ, эбеди уьмуьрдик кутунвай къуватдалди Адакай хахам хьана. 17ГьикӀ лагьайтӀа Каламди шагьидвалзава:

«Мелик-Садикьан дережа авай
хахам я Вун эбеди яз» ^a.

18Гьа икӀ, виликан тагьким къуватдай вегьенва, вучиз лагьайтӀа ам зайифди ва вичикай хийир авачирди хьана. 19Къанунди гьич са карни тамамди авунач, амма са гьихьтин ятӀани хъсанвал хьунин умуд гузва. Адан куьмекдалди чун Аллагьдиз мукьва жезва.

20ИкӀ тирди Аллагьдин кьине тестикь авунни лишан алай кар я. Маса хахамрив чпин къуллугъ кьин галачиз агакьзавай, 21амма Месигьдикай хахам Адаз икӀ Лагьайдан кьинелди хьана:

«Кьин кьуна Реббиди ва алатдач гафунилай:
Вун хахам я эбеди яз» ^b.

22Гьа и саягъда Исадикай генани хъсан Икьрардин заминвал ийизвайди хьана.

23А хахамар гзаф авай, садбур рекьизвай, абурун чкадал масадбур къвезвай, 24амма Исадал эбеди яз чан ала, Адан хахамвални эбеди я. 25Гьавиляй Вичи Аллагьдин патав гъизвайбур тамамдиз хиласдай къуват ава Адахъ. Адал датӀана чан ала ва Ада датӀана абурун патахъай векилвал ийизва.

26Иллаки гьа ихьтин Кьилин хахам тир чаз герекди: пакди, са тахсирни, са рехнени квачирди, гунагькаррикай чаради ва цаварилайни вине авайди. 27Маса кьилин хахамри сифтени-сифте чпин ва анжах ахпа халкьдин гунагьрай къурбандар ийизвайвал, Ада гьар юкъуз къурбандар авунин лазимвал авач. Ада икӀ садра ва эбеди яз, Вичи Вич къурбанд ийидайла, авуна. 28Къанун тирвал, кьилин хахамар яз адетдин зайиф инсанар тайинарзава, амма Къанундилай гуьгъуьниз кьур кьин тирвал, кьилин хахамвал авун патал эбеди яз кӀвачинарнавай Хва тайинарнай.