Hebrews 8
Иса цӀийи Икьрардин кьилин хахам я
1Чна квез лугьузвайдакай кьилинди ам я хьи, чахъ гьахьтин Кьилин хахам ава, Вични цаварал Аллагьдин эрчӀи гъилихъай ацукьнава, 2инсанри ваъ, Реббиди эцигнавай халисан Алачухда, пакханада къуллугъзавайди я. 3Гьар са кьилин хахамди садакьаяр ва къурбандар гъун абуруз тайинарнавай кар я, гьавиляй чи Кьилин хахамдихъни къурбанд ийиз жедай хьтин са вуч ятӀани хьун лазим тир. 4Ам исятда чилел алайтӀа, Адакай гьатта хахамни жедачир, вучиз лагьайтӀа Къанундив кьадайвал къурбандар ийизвай хахамар гьакӀни авазва. 5Абуру цава авай пакханадин хъен тир ва адаз ухшар пакханада ибадатни кьилиз акъудзава. Гьавиляй Мусадиз ада алачух эцигдалди вилик эмир авунай: «Килиг гьа, – лагьанай Аллагьди, – вири ваз дагъдал къалурай тегьерда дуьм-дуьз ая» a. 6Амма исятда Месигьдиз чилел алай хахамрин къуллугъдилай гзаф артуханвал авай къуллугъ тапшуругъ авунва, вучиз лагьайтӀа Ам Аллагьди инсандихъ галаз кутӀунай, лап хъсан хиве кьунар бинеда авай лап хъсан Икьрардин арачи я. 7Сифтегьан Икьрар нукьсанар квачирди тиртӀа, кьвед лагьайдан лазимвал авачир эхир. 8Амма Аллагьди, инсанрин нукьсанар акваз, лугьузва: «Ингье, – лугьузва Реббиди, –За Исраилдин кӀвалихъ ва Ягьудан кӀвалихъ галаз
цӀийи Икьрар кутӀундай йикъар алукьзава.
9 И Икьрар За абур гъил кьуна Мисридай акъудай чӀавуз
абурун бан-бубайрихъ галаз кутӀунай Икьрар
хьтинди жедач,
вучиз лагьайтӀа абуру Захъ галаз авур Икьрардиз вафа хуьзвачир,
ва За абуруз далу ганай, – лугьузва Реббиди. –
10 Ингье, за гележегда
Исраилдин кӀвалихъ галаз
ахьтин Икьрар кутӀунда хьи, – лугьузва Аллагьди, –
Зи Къанунар За абурун акьулда твада
ва абурун рикӀера кхьида.
Закай абурун Аллагь жеда,
абурукайни зи халкь жеда.
11 Ва мад сада садаз,
стхади стхадиз,
„Аллагь кьатӀутӀ“лугьуз, тарсар гудач,
вучиз лагьайтӀа
Зун гъвечӀидалай чӀехидалди виридаз чир жеда.
12 ГьикӀ лагьайтӀа За абурун
гунагьрилай гъил къахчуда
ва мад абурун гунагьар рикӀел хкидач» b.
13Ада и Икьрардиз цӀийиди лагьана ва адалди сифтегьан Икьрар цӀуру хьанвайди къалурна. ЦӀуру ва чуру хьанвайди фад квахьда.
Copyright information for
LezIBTNT